इनरुवा । सुनसरीको सीमावर्ती क्षेत्र भोक्राहा नरसिंह गाउँपालिकाको सोनियाहीमा निशुल्क स्वास्थ्य शिविर सम्पन्न भएको छ । स्थानीयहरुको स्वास्थ्यलाई मध्यनजर गरि गाउँटोलमा भोक्राहा नरसिंह गाउँपालिकाको आयोजना र इनरुवा जिल्ला अस्पताल सुनसरीको सहयोगमा गाउँपालिकाको दुर्गम भनिएको वडा नम्बर ८ को सोनियाही,उल्टीमा स्वास्थ्य शिविर सम्पन्न भएको हो ।
भोक्राहा नरसिंह गाउँपालिकाका अध्यक्ष तथा प्रमुख अतिथि अजमल अख्तर आजादले शिविरको उद्घाटन गर्नु हुदै निशुल्क स्वास्थ्य शिविरबाट गरिब तथा अति विपन्न परिवारका सदस्यहरुलाई प्रत्यक्ष रूपमा लाभ मिल्ने बताए । उनले नागरिकलाई स्वास्थ्य राख्नका लागि गाउँपालिकाले हरसम्भव सहयोग गर्ने र त्यसै मध्येको वडाहरुमा निःशुल्क स्वास्थ्य शिविर कार्यक्रम पनि एक भएको बताए ।
सम्पन्न भएको शिविरमा विभिन्न गाउँटोलका ९० जनाले सेवा लिनुभएको थयोे । गाउँगाउँ स्वास्थ्य सेवा कार्यक्रम अन्तर्गत ९० जनाले स्वास्थ्य परिक्षण गराई सेवा लिनुभएको भोक्राहा नरसिंह गाउँपालिका स्वास्थ्य शाखा प्रमुख हिरा साहले जानकारी दिए ।
स्वास्थ्य शाखा प्रमुख साहका अनुसार शिविरबाट सीमावर्ती क्षेत्रका दलित, मुस्लिम सहित गरिब तथा अति विपन्न परिवारका सदस्यहरुलाई प्रत्यक्ष लाभ मिलेको छ । स्वास्थ्य शिविर कार्यक्रममा भोक्राहा नरसिंह गाउँपालिका अध्यक्ष सहित उपाध्यक्ष सुनिता कुमारी उराँव, भोक्राहा नरसिंह गाउँपालिका वडा नम्बर ८ का वडा अध्यक्ष उस्मान मियाँ, इनरुवा अस्पातलका डा. देवराज घिमिरे लगायतकाले शिविरको औचित्य र आवश्यकताका बारेमा बोल्नुभएको थियो ।
