भोक्राहा । सुनसरीको भोक्राहा नरसिंह गाउँपालिकाले गठन गरेको उच्च स्तरीय शैक्षिक सुधार अध्ययन कार्यदलले प्रतिवेदन बुझाएको छ । शिक्षा शाखाको संयोजनमा असार ३० गतेदेखि साउन २३ गतेसम्म गाउँपालिकाका ८ वटै वडामा गरिएको अनुगमन तथा निरीक्षण पछि कार्यदलले बिहिबार एक कार्यक्रम गरी गाउँपालिका अध्यक्ष र उपाध्यक्षलाई प्रतिवेदन बझाएको हो ।
धिरेन्द्र प्रसाद यादवको संयोजक्तोमा बनेको १० सदस्य कार्यदलले एक महिना समय लगाएर गाउँपालिकाको ६६ वटा शैक्षिक संस्थाहरूको अनुगमन तथा निरीक्षण गरिएको थियो । अनुगमन टोलीले २६ वटा सामुदायिक विद्यालय, १५ वटा धार्मिक विद्यालय र २५ वटा सामुदायिक बाल विकास केन्द्रको अनुगमन तथा निरीक्षण गरिएको थियो ।
कार्यदलले बुझाएको प्रतिवेदनमा गाउँपालिका भित्र रहेका शैक्षिक संस्थामा देखिएको बेथिति, भ्रष्टाचार, मनोमानी र फर्जी बिद्यार्थीहरुका विषयहरू समेटिएका छन् । प्रत्येक शैक्षिक संस्थाको वर्तमान अवस्था, समस्याहरू र समाधानका विषयहरू समेत सुझावको रूपमा कार्यदलले प्रतिवेदनमा उल्लेख गरेको थियो । विभिन्न वडामा सञ्चालित विद्यालय, मद्रासा र बाल विकास केन्द्रमा शिक्षकहरूको दरबन्दी अभाव भएको, अध्यापन राम्रो नगराइएको, बिद्यार्थीहरु उपस्थित नभएको, शैक्षिक सामाग्रीहरूमा भ्रष्टाचार गरेको र पाठ्यपुस्तक व्यवस्थापन राम्रो नभएको जस्ता समस्याहरू समावेश गरिएको जनाइएको छ । साथै समस्याहरूको समाधानका उपायहरू समेत सुझावको रूपमा उल्लेख गरिएको उच्च स्तरीय शैक्षिक सुधार अध्ययन कार्यदलका संयोजक धिरेन्द्र प्रसाद यादवले जानकारी दिनुभयो । अब विगतमा झैँ मनलाग्दी रूपले शैक्षिक क्षेत्रमा हुने बेथिति र भ्रष्टाचारलाई हटाउने अभियानको सुरुवात भएको समेत उनले बताए ।
प्रतिवेदनमा कतिपय शिक्षक तथा प्रअहरुलाई निष्कासन गर्नुपर्ने र नयाँ शिक्षकहरूको दरबन्दी थप गर्नुपर्ने विषयहरू समेत प्रतिवेदनमा समेटिएको यादवले बताउनुभयो ।
प्रतिवेदन बुझ्दै गाउँपालिका अध्यक्ष अजमल अख्तर आजादले अब आफ्नो कार्यकालमा शिक्षाको अवस्था सुधार हुने उद्घोष गर्नुभयो । वहाँले शिक्षाको नाममा बेथिति र भ्रष्टाचार गर्ने जो कोहीलाई कारबाहीको भागिदार बनाउने बताउनुभयो ।
राजनीतिक प्रभाव समेत नहेरी शिक्षा क्षेत्रमा सुधार आफूले ल्याउने वहाँको भनाई छ । प्रतिवेदनमा उल्लेख गरिएका विषयहरू कार्यपालिकाबाट अनुमोदन गरी व्यवहारमा देखिने अध्यक्ष आजादले बताउनुभयो ।
कार्यक्रममा प्रमुख प्रशासकीय अधिकृत बाबु नन्दन मेहताले पनि शिक्षा क्षेत्रमा अब परिवर्तन हुने बताउनुभयो । गाउँपालिकाले बनाएको कार्यदलले कसैको दबाब र प्रभावमा नपरी बनाएको प्रतिवेदन कार्यान्वयन गरिने र यसमा सबै अभिभावकहरूले साथ दिनुपर्नेमा जोड दिनुभयो । साथै यस्ता अनुगमन तथा निरीक्षक अब समय समयमा हुने समेत वहाँले बताउनुभयो ।
कार्यक्रममा गाउँपालिका उपाध्यक्ष सुनिता कुमारी उराँव, अध्यक्ष आजाद र प्रशासकीय अधिकृत मेहता लगायत अतिथिहरूले कार्यदलमा रहेका सदस्यहरूलाई सम्मान र मायाको चिनो प्रदान गर्नुभयो । कार्यक्रममा शिक्षा शाखा प्रमुख रमेश तिम्सिना, सञ्चारकर्मी तथा सरोकारवाला निकायहरूको उपस्थिति रहेको थियो ।
