इनरुवा । कोशी गाउँपालिकामा १० औं संविधान दिवसको अवसरमा मावि स्तरीय वक्तृत्वकला प्रतियोगिता सफलतापूर्वक सम्पन्न भएको छ। बिहिवारको प्रतियोगिताको आयोजना कोशी गाउँपालिकाको कार्यालयले गरेको थियो।
प्रतियोगिताको अध्यक्षता कोशी गाउँपालिका अध्यक्ष ऐयुब अन्सारीले गरेका थिए, जबकि प्रमुख अतिथिका रूपमा नवनियुक्त कोशी प्रदेश सरकारका वन, वातावरण तथा पर्यटन मन्त्री सदानन्द मण्डल उपस्थित थिए।
प्रतियोगितामा राष्ट्रिय मावि लौकहीकी ईशा कुमारी पुरीले प्रथम स्थान प्राप्त गरिन्। दोस्रो र तेस्रो स्थानमा क्रमशः राष्ट्रिय मावि शोभनपुरका सहवाज मन्सुरी र मदरसा दारुल होदा एण्ड सलफियाकी हसिबा खातुनले सफलता प्राप्त गरेका छन्।
प्रतियोगितामा कोशी गाउँपालिका क्षेत्रका आठवटा माविका विद्यार्थीहरू सहभागी भएका थिए। “राज्य संचालनको मेरुदण्ड संविधान” भन्ने शीर्षकमा आयोजित प्रतियोगितामा पुरस्कार वितरण मन्त्री सदानन्द मण्डल, ऐयुब अन्सारी, उपाध्यक्ष अनिता यादव, र अन्य अतिथिहरूद्वारा गरिएको थियो।
कार्यक्रममा विभिन्न जनप्रतिनिधि, शिक्षक, विद्यार्थी, र अभिभावकको उल्लेख्य उपस्थिती थियो। उपाध्यक्ष अनिता यादवले स्वागत मन्तव्य व्यक्त गरिन् भने कार्यक्रमको सञ्चालन नायब सुब्बा बिरेन्द्र मेहताले गरेका थिए।
