उत्तर प्रदेश, भारत । महाकुम्भ मेलाबाट फर्किने क्रममा भएको गाडी दुर्घटनामा चार नेपाली तिर्थयात्रीको मृत्यु भएको छ भने सात जना घाइते भएका छन्। नम्बर खुल्न नसकेको स्कार्पियो गाडी शुक्रबार अबेर राति गोरपुरमा ट्रयाक्टरमा ठोक्किएर दुर्घटनाग्रस्त भएको हो।
दुर्घटनामा सप्तरीको कंचनरूप नगरपालिका वडा नम्बर ७ की लिलावती चौधरी, परसुराम चौधरी, वडा नम्बर ५ की हरिहर देवीको घटनास्थलमै मृत्यु भएको छ। मृतक एकजनाको नाम खुल्न सकेको छैन तर उनी सप्तरीकै रहेको बुझिएको छ।
स्कार्पियोमा रहेका अन्य सात जना घाइते भएका छन्। घाइतेमध्ये उपेन्द्र यादव, लालू देवी, जीतू यादव र मुकेया यादवको नाम खुलेको छ। भारतीय संचारमाध्यमका अनुसार घाइतेहरुलाई प्रहरीको सहयोगमा जिल्ला अस्पताल पठाइएको छ।
दुर्घटनाको कारणबारे विस्तृत जानकारी आइसकेको छैन। स्थानीय प्रशासनले घटनाको अनुसन्धान गरिरहेको छ।
