इनरुवा । सुनसरीको इनरुवा नगरपालिका–२ मा राष्ट्र सेविका नेपाल जिल्ला कार्यकारिणी सुनसरीको आयोजनामा भव्य होली मिलन कार्यक्रम सम्पन्न भएको छ। हरेक वर्ष सदरमुकाम इनरुवामा सामूहिक रूपमा होली मिलन कार्यक्रम आयोजना गर्दै आइएकोमा यस वर्ष पनि उल्लासमय वातावरणमा कार्यक्रम सम्पन्न भएको हो।
तराई क्षेत्रमा होली पर्व विशेष उत्साहका साथ मनाइने परम्परा अनुसार इनरुवामा आयोजित यो कार्यक्रममा स्थानीय बासिन्दा, सामाजिक अभियन्ता, तथा विभिन्न क्षेत्रका विशिष्ट व्यक्तिहरूको उपस्थिति रहेको थियो। रंग, अबिर, तथा संगीतको माहोलमा उपस्थित सहभागीहरूले होली पर्वको उल्लासमय वातावरण अनुभव गरे।
यस अवसरमा भाइचारा, प्रेम, र सामाजिक सद्भावको सन्देश फैलाउने उद्देश्यका साथ विभिन्न सांस्कृतिक तथा मनोरञ्जनात्मक कार्यक्रमहरू समेत प्रस्तुत गरिएका थिए। कार्यक्रममा सहभागीहरूले एकअर्कालाई रंग लगाई समाजमा सद्भाव र एकताको भावना जागृत गर्नुपर्ने कुरामा जोड दिए।
सुनसरीका विभिन्न स्थानहरूमा समेत आज होली पर्व हर्षोल्लासका साथ मनाइँदैछ। बच्चादेखि वृद्धसम्म होलीको रौनकतामा रमाएका दृश्यहरू इनरुवाका गल्ली तथा सार्वजनिक स्थलहरूमा देख्न सकिन्छ।
– VOP खबर
