इटहरी । कोशी प्रदेशका मुख्यमन्त्री हिक्मतकुमार कार्कीले दिगो विकासका लागि प्रभावकारी पूर्वाधार नीति आवश्यक रहेको बताएका छन्। मुख्यमन्त्री तथा मन्त्रिपरिषद्को कार्यालयमा आज आयोजित पूर्वाधार नीति तर्जुमा कार्यक्रममा सम्बोधन गर्दै उनले नीति बनाएर काम गर्दा योजना आयोगको आवधिक योजना तथा सरकारका वार्षिक कार्यक्रमसँग समन्वय गर्न सहज हुने र यसले विकासलाई सही ढंगले अगाडि बढाउन सहयोग पुग्ने विश्वास व्यक्त गरे।
जलवायु परिवर्तनको प्रभावका कारण विकास निर्माण नीति बनाएर अघि बढ्नुपर्ने आवश्यकता रहेको उनले उल्लेख गरे। जलवायु परिवर्तनलाई बेवास्ता गर्दा विकास निर्माणले विपत्ति निम्त्याएको उदाहरण प्रस्तुत गर्दै मुख्यमन्त्री कार्कीले जोखिम आँकलन गरी नीति निर्माण गर्नुपर्नेमा जोड दिए।
“सडक र पुल जस्ता पूर्वाधार बनाउनेबित्तिकै भत्किने अहिलेको अवस्था सुधार्न पूर्वाधार नीति आवश्यक छ,” उनले भने। साथै, विपद् र जलवायु परिवर्तनलाई ध्यानमा राखेर पूर्वाधार नीति निर्माण गर्नुको विकल्प नभएको उनले बताए।
पूर्वाधार नीति तर्जुमा गोष्ठीमा कोशी प्रदेश सरकारका मन्त्री, सचिव तथा विज्ञहरूको सहभागिता रहेको थियो।
