विराटनगर । कोशी प्रदेश सभाबाट पारित भई नेपालको संविधानको धारा २०१ को उपधारा १ अनुसार सभामुखबाट प्रमाणित गरिएका पाँच विधेयकहरू प्रदेश प्रमुख परशुराम खापुङले प्रमाणीकरण गरेका छन्।
प्रदेश प्रमुख खापुङले संविधानको धारा २०१ को उपधारा २ बमोजिम २०८१ फागुन २९ गते ती विधेयकहरू प्रमाणीकरण गरेका हुन्। प्रमाणीकरण भएका विधेयकहरूमध्ये प्रदेश जीवनाशक विषादी व्यवस्थापन, बीउबिजनसम्बन्धी कानुनी संरचना, केही प्रदेश ऐन संशोधन, प्रदेश भवन ऐन संशोधन, तथा कोशी प्रदेश वातावरण संरक्षण ऐन संशोधन सम्बन्धी विधेयकहरू रहेका छन्।
यस प्रमाणीकरणसँगै प्रदेशभित्र विषादी व्यवस्थापन, बीउबिजन आपूर्ति, भवन निर्माण तथा वातावरण संरक्षणका कानुनी व्यवस्था थप सशक्त हुने अपेक्षा गरिएको छ। पारित विधेयकहरूले प्रदेशभित्रको कानुनी संरचना व्यवस्थित गर्दै सरोकारवालाहरूका लागि स्पष्ट कानुनी आधार प्रदान गर्ने विश्वास गरिएको छ।
