इनरुवा । पछिल्लो समय कोशी प्रदेशका विभिन्न जिल्लामा सहकारी संस्थाहरूले स्थानीय जनजीवनमा सकारात्मक प्रभाव पार्न थालेका छन्। कृषि, पशुपालन, लघु उद्यम, महिला सशक्तिकरण र वित्तीय पहुँच विस्तारजस्ता क्षेत्रमा सहकारीले उल्लेखनीय भूमिका निर्वाह गरिरहेका छन्।
सुनसरीको भोक्राहा नरसिंह गाउँपालिकामा सञ्चालित ‘समृद्ध बचत तथा ऋण सहकारी संस्था’ले महिला उद्यमशीलताको विकासमा योगदान पुर्याउँदै आएको छ। संस्थामा आबद्ध महिलाहरूले दूध उत्पादन, तरकारी खेती, सिलाइकटाइ लगायतका क्षेत्रमा आर्थिक स्वतन्त्रता प्राप्त गरेका छन्।
झापाको अर्जुनधारा नगरपालिकामा संचालित एक सहकारीले कृषि औजार भाडामा दिने, आधुनिक प्रविधिमा आधारित तालिम सञ्चालन गर्ने र बजार व्यवस्थापनमा सहयोग पु¥याउने काम गरिरहेको छ। यसले किसानहरूलाई आत्मनिर्भर बनाउनेतर्फ प्रोत्साहित गरेको छ।
विराटनगर महानगरपालिका–५ स्थित ‘जनशक्ति बहुउद्देश्यीय सहकारी संस्था’ले युवाहरूलाई स्वरोजगारमुखी उद्यममा आकर्षित गर्न सीपमूलक तालिम र सहुलियत ऋण प्रवाह गर्दै आएको छ। संस्थाका अध्यक्ष रमेश चौधरीका अनुसार “सहकारी मार्फत युवालाई विदेश पलायनबाट रोक्न सकिने ठोस सम्भावना देखिएको छ।”
सहकारी मन्त्रालय, कोशी प्रदेशका अनुसार हाल प्रदेशमा झण्डै ५ हजार सहकारी संस्था दर्ता छन्, जसमध्ये ३५ प्रतिशत सक्रिय रुपमा समुदायमा सेवा दिइरहेका छन्। मन्त्रालयले आगामी आर्थिक वर्षदेखि सहकारी शिक्षा अभियान सञ्चालन गर्ने तयारी गरिरहेको छ, जसअन्तर्गत विद्यालयस्तरमै सहकारीको अवधारणा समावेश गरिनेछ।
सहकारी विज्ञहरू भन्छन् – सहकारी भनेको केवल बचत र ऋणको माध्यम मात्र नभई सामाजिक एकता, पारस्परिक सहयोग र आर्थिक समावेशीकरणको प्रभावकारी साधन हो। सहकारीको प्रभावकारी कार्यान्वयनले मात्रै ‘समृद्ध नेपाल, सुखी नेपाली’ को लक्ष्यमा पुग्न सकिने उनीहरूको भनाइ छ।
