विराटनगर । कोशी प्रदेश सरकारद्वारा घोषित पर्यटन वर्ष २०८२ लाई सफल बनाउन भारत-नेपालबीच आपसी सहकार्य र समन्वय अत्यन्त जरुरी रहेको विचार भारतका लोकसभा सदस्य माननीय रामप्रित मण्डलले व्यक्त गर्नुभएको छ।
प्रदेश सरकार, पर्यटन, वन तथा वातावरण मन्त्रालयको विशेष निमन्त्रणामा नेपाल भ्रमणमा आएका सांसद मण्डल आज मन्त्री सदानन्द मण्डलको नेतृत्वमा सुनसरीको ऐतिहासिक तथा धार्मिक स्थल बराहक्षेत्र मन्दिर, रामधुनी लगायत विभिन्न क्षेत्रहरूको भ्रमणमा सहभागी हुनुभयो।
दर्शनपछि मन्त्री मण्डलले आफ्नै कार्यकक्षमा नेपाली पहिचान र मायाको प्रतीक स्वरूप ढाकाटोपी, दौरा सुरुवाल सहित उहाँलाई सम्मानपूर्वक विदाई गर्नुभयो।
भ्रमणको क्रममा मन्त्री र सांसदबीच पर्यटन वर्ष २०८२ अन्तर्गत गरिने कार्यक्रम, भारत-नेपालबीचको धार्मिक पर्यटन प्रवर्द्धन, सीमावर्ती क्षेत्रका साझा पर्यटन परियोजनाहरूमा सहकार्य, तथा दुवै देशबीचको सांस्कृतिक आदानप्रदानलाई प्रवर्द्धन गर्ने विषयमा समेत गहन छलफल भएको थियो।
कार्यक्रममा मन्त्रालयका सचिव विशाल घिमिरे, सचिवालयका अन्य कर्मचारी, विभिन्न प्रतिनिधि तथा सञ्चारकर्मीहरूको उपस्थिति रहेको थियो।
