इनरुवा । सुनसरीको भोक्राहा नरसिंह गाउँपालिकाले अब हरेक कार्यदिवसमा राष्ट्रिय गान गायनपछि मात्रै सेवा प्रवाह सुरू गर्ने व्यवस्था लागू गरेको छ।
यसअघि गाउँपालिकाले सार्वजनिक कार्यक्रम, औपचारिक सभा तथा अन्य सरकारी गतिविधिहरू राष्ट्रिय गानबाट सुरू गर्दै आएकोमा उक्त अभ्यासलाई थप विस्तार गर्दै दैनिक कार्यालय सेवाप्रवाहमै लागू गरिएको हो।
गाउँपालिका कार्यालयका अनुसार अब प्रत्येक कार्यदिवस बिहान ठीक १०:०५ बजे राष्ट्रिय गान गायन गरिनेछ र त्यसपछि मात्र कार्यालयबाट सेवा प्रदान गरिनेछ। यो निर्णय बिहीबारदेखि औपचारिक रूपमा कार्यान्वयनमा आएको हो।
गाउँपालिकाले यस कदमले कर्मचारी तथा सेवाग्राहीमा राष्ट्रिय भावना, अनुशासन र जिम्मेवारीबोध बढ्ने विश्वास लिएको छ। साथै, सार्वजनिक सेवामा राष्ट्रप्रति सम्मान र प्रतिबद्धता झल्किने उद्देश्यसमेत रहेको गाउँपालिकाले जनाएको छ।
