विराटनगर । सुनसरीको सदरमुकाम इनरुवामा रहेको जिल्ला अस्पताल स्वास्थ्य बिमा बापतको लगभग ६ करोड रकम नपाएर आर्थिक संकटमा फस्न पुगेको छ। बिमा बोर्डले २०८० चैत महिनादेखि बक्यौता रकम भुक्तानी नगरेपछि अस्पतालको ओपिडी, औषधि, ल्याब र एक्स-रे जस्ता सेवा प्रभावित भएका छन्।
मेडिकल सुपरिटेन्डेन्ट डा. अभिताव ठाकुरका अनुसार अस्पतालले आफ्नो आन्तरिक आम्दानीको अधिकांश हिस्सा बिमा सेवामा खर्च गरेको थियो, तर भुक्तानी नपाउँदा अस्पतालको आर्थिक अवस्था झनै नाजुक बनेको छ। “औषधि, ल्याब केमिकल र अन्य आवश्यक सामाग्रीको आपूर्तिमा समस्या आउन थालेको छ,” डा. ठाकुरले भने।
अस्पतालका कर्मचारीलाई तलबसमेत दिन नसक्ने अवस्था आएको छ, र केही सेवाहरू बन्द हुनुको साथै बिरामीहरूले औषधि निजी क्लिनिकमा किन्न बाध्य भएका छन्। अस्पतालले ५० बेडको क्षमता राख्दछ र यसमा १ सय २० जना कर्मचारी कार्यरत छन्। अस्पताल प्रशासनले चाँडै बिमा बोर्डले बक्यौता रकम पठाएमा मात्र स्वास्थ्य सेवा सहज ढंगले चलाउन सक्ने बताएको छ।
