सुनसरी । कोशी प्रोजेक्ट अन्तर्गत बाँध मर्मत कार्यमा संलग्न निर्माण व्यवसायी तथा ठेकेदारहरूले कोशी टप्पु वन्यजन्तु आरक्षका वार्डेन रामदेव चौधरीमाथि अनावश्यक अवरोध पुर्याएको आरोप लगाएका छन्।
ठेकेदारहरूका अनुसार कानुनी प्रक्रिया अनुरूप अनुमति आदेश दिनुपर्नेमा वार्डेन चौधरीले मौखिक रूपमा अनावश्यक शर्तहरू राखेर काममा बाधा पुर्याइरहेका छन्। “समयमै काम सम्पन्न गर्नुपर्ने दायित्व छ, तर प्रशासनिक अड्चनका कारण समस्या भइरहेको छ,” एक ठेकेदारले बताए।
तर, कोशी टप्पु वन्यजन्तु आरक्ष कार्यालयले भने मर्मत कार्यमा कुनै अवरोध नगरिएको दाबी गरेको छ। कार्यालयका अनुसार ठेकेदारहरूले तोकिएको राजस्व तिर्नुपर्ने वा वैकल्पिक स्रोतबाट बालुवा प्रयोग गर्नुपर्ने नियम भएकाले सोहीअनुसार निर्देशन दिइएको हो।
यता, प्रभावित ठेकेदारहरूले कानुनी रूपमा आवश्यक प्रक्रिया पूरा गर्न तयार रहेको तर अनावश्यक झन्झट सिर्जना गर्नु गलत भएको बताएका छन्। “हामी सबै कानुनअनुसार नै काम गर्छौं, तर सरकारी कार्यालयकै व्यवहारले काममा ढिलाइ भएको छ,” अर्का एक ठेकेदारले बताए।
ठेकेदार देवकुमार यादव र ठेकेदार प्रतिनिधि कन्हिया गुप्ताले बुधबार पत्रकार सम्मेलन गर्दै कोशी बाँध मर्मतमा अवरोध हुँदा सबैभन्दा ठूलो क्षति स्थानीयवासीलाई हुने बताएका छन्। “यो बाँध सुरक्षित नरहे लाखौं मानिस जोखिममा पर्न सक्छन्, त्यसैले अवरोध हटाएर मर्मत कार्य छिटो सम्पन्न गर्नुपर्छ,” यादवले बताए।
बाँध मर्मत जस्तो महत्वपूर्ण कार्य अवरुद्ध हुँदा स्थानीयवासी र सरोकारवाला निकायहरूले समेत चासो देखाएका छन्। यदि समस्या तत्काल समाधान नभए मर्मत कार्यमा थप ढिलाइ भई कोशी आसपासका क्षेत्रलाई खतरामा पार्न सक्ने चिन्ता व्यक्त गरिएको छ।
“यदि अबिलम्ब समाधान गरिएन भने, हामी अन्य विकल्पहरू खोज्न बाध्य हुनेछौँ,” ठेकेदार गुप्ताले थपे। बाँधको मर्मत ढिलाइ हुँदा वर्षायाममा कोशी नदीको बहाव नियन्त्रण गर्न समस्या आउने र सम्भावित बाढीको जोखिम बढ्ने स्थानीयवासीहरूको धारणा छ।
स्थानीय प्रशासन, कोशी टप्पु वन्यजन्तु आरक्ष, निर्माण कम्पनीहरू तथा अन्य सरोकारवालाबीच सहकार्य गरी समस्या समाधान गर्नुपर्ने माग बढ्दै गएको छ।
