इटहरी । इटहरीको मुख्यचौकमा रहेको व्यावसायिक भवन सेन्टर प्लाजामा आज बिहान करिब ९ बजे पाँचौं तलाबाट अचानक आगलागी भएको थियो । आगलागी नियन्त्रण गर्न नेपाल प्रहरी, सशस्त्र प्रहरी बल, नेपाली सेना गरी ३२२ जनाको टोली परिचालित भएको छ। साथै, विभिन्न स्थानीय तहका १२ दमकल घटनास्थलमा परिचालन भएका छन्।
आगलागीपछि प्लाजाभित्र फसेका ११ जनालाई नेपाली सेनाको हेलिकोप्टरमार्फत उद्धार गरिएको छ। उद्धार गरिएकामध्ये २ पुरुष र १ महिला घाइते भएका छन्, जसलाई उपचारका लागि इटहरी अस्पताल पठाइएको छ।
प्रहरीका अनुसार हाल पनि सेन्टर प्लाजाभित्र अन्य व्यक्तिहरूको खोजी तथा उद्धार कार्य जारी छ। आगलागीको कारण खुल्न सकेको छैन भने क्षतिको विवरण संकलन कार्य भइरहेको छ। सुरक्षाकर्मीको सहयोगमा आगो निभाउने प्रयास तीव्र रूपमा भइरहेको जिल्ला प्रहरी कार्यालय सुनसरीले जनाएको छ ।
