सुनसरी | संघीय र प्रदेश सरकारको समन्वयमा सुनसरी क्षेत्र नं. ४ का लागि चालु आर्थिक वर्षमा झण्डै ६७ करोड ८१ लाख रुपैयाँ बराबरको विकास बजेट स्वीकृत भएको छ। प्रतिनिधिसभा सदस्य ज्ञानेन्द्र बहादुर कार्की र कोशी प्रदेशसभा सदस्य हाजी इस्राइल मन्सुरीको सक्रिय पहलमा शहरी विकास मन्त्रालयको ‘रातो किताब’ अन्तर्गत १७ वटा योजनाहरू बजेटमा समावेश गरिएका हुन्।
स्वीकृत बजेटअन्तर्गत पुल निर्माण, सडक स्तरोन्नति, सामुदायिक तथा शैक्षिक पूर्वाधार, धार्मिक–पर्यटन मार्ग लगायतका परियोजनाहरू समावेश छन्। प्रमुख योजनाहरूमा सुनसरी खोलामा हरिनगर–६ मा ४ करोडको पुल निर्माण, भोक्राहा नरसिंह–१ मा बाउनी खोलामा ३ करोडको पुल निर्माण, हरिनगर–१ मा सिँचाइका लागि ७० लाखको सित भण्डार, र रामधुनी क्षेत्रमा ४२ किलोमिटर कालोपत्रे सडकका लागि ३८ करोड ३७ लाख ९० हजार बजेट समावेश गरिएको छ।
इनरुवा नगरपालिका–३ मा ३ करोडको सभाहल निर्माण, हरिनगर मावि (वडा ४) को पूर्वाधार निर्माणमा ३ करोड, देवानगञ्ज–बन्देश्वर सडक स्तरोन्नतिमा ३ करोड, चिरौली चौक सडक सुधारमा ९ लाख जस्ता अन्य योजना पनि समावेश छन्।
बराहक्षेत्र नगरपालिकाका लागि मात्र करिब १९ करोडभन्दा बढी बजेट छुट्याइएको छ। चतरा लाल बस्ती सडक स्तरोन्नतिमा १३ करोड, बाङ्गे बजारदेखि बसपार्क जोड्ने सडकमा ३ करोड, खानेपानी टंकी निर्माणमा ५० लाख, विभिन्न टोलहरू जोड्ने सडक स्तरोन्नतिमा थप करोडौं बजेट विनियोजन गरिएको छ।
स्थानीयवासीहरू जनप्रतिनिधिहरूको दलगत सीमाभन्दा माथि उठेर गरिएको पहलप्रति कृतज्ञता प्रकट गर्दै भन्छन्, “हिरा जहाँ भए पनि चम्किन्छ।” उनीहरूका अनुसार, योजना कार्यान्वयनले बस्तीहरू सुरक्षित, यातायात सुलभ, विद्यालय तथा सामुदायिक संरचना सुदृढ हुने छन्। साथै, कृषक, साना उद्यमी र धार्मिक–पर्यटन मार्ग प्रयोगकर्ताका लागि पनि आर्थिक गतिविधिमा नयाँ सम्भावना खुल्ने विश्वास गरिएको छ।
सांसद कार्कीको नेतृत्व र मन्सुरीको सहकार्यले विकासको गतिमा तीव्रता आएको स्थानीयको भनाइ छ। सफल कार्यान्वयनका लागि स्थानीय तहको सहकार्य र नागरिकको निगरानीलाई अनिवार्य ठहर गर्दै, समावेश योजनाहरू समयमै सम्पन्न गरिने अपेक्षा गरिएको छ ।
