सुनसरी । लगातार विवादमा फँसिरहेको जिल्ला अस्पताल सुनसरी फेरि एकपटक चर्चामा आएको छ। अस्पतालका प्रमुख र अस्पताल व्यवस्थापन समितिका अध्यक्ष राजन मेहताको एकपक्षीय निर्णय, राजनीतिक प्रतिशोध र आन्तरिक मतभेदका कारण संवेदनशील स्वास्थ्य संस्था लामो समयदेखि विवादको केन्द्रमा रहेको स्थानीयवासीको आरोप छ।
यसैबीच, नेपालटाइमलाइनन्युज मार्फत करार सेवामा भर्ना प्रक्रियामा ‘सेटिङ’ नमिलेकै कारण राजन मेहताले ठाडो निर्देशन दिँदै रोकिदिएको परीक्षा सम्बन्धी समाचार हिजो मात्र सार्वजनिक भएको थियो। उक्त समाचारको प्रत्यक्ष प्रभावमा, अस्पताल प्रशासनले रातारात यू–टर्न लिँदै रोकिएको परीक्षाको मिति तोकेको हो।
अस्पतालको आधिकारिक फेसबुक पेजमार्फत प्रकाशित सूचनामा मिति २०८२ साउन ३१ गते बिहान ७:३० बजे मेडिकल अधिकृतको लिखित परीक्षा र सोही दिन दिउँसो २:०० बजे अन्तरवार्ता हुने उल्लेख छ।
स्थानीयवासी र स्वास्थ्यकर्मीहरूले यस घटनालाई “समाचारको शक्तिले प्रशासन झुकाएको” स्पष्ट उदाहरणका रूपमा टिप्पणी गरेका छन्।
