विराटनगर । मृत घोषणा गरेर शवगृहमा राखेको व्यक्ति जीवित पाइएको भन्ने समाचार झुटो रहेको पाइएको छ । सरकारी सञ्चारमाध्यम गोरखापत्र दैनिकले सोमबार प्रकाशित ‘अस्पतालले मृत घोषणा गरेको व्यक्ति जीवित’ शिर्षकको समाचार तथ्यगत रुपमा गलत रहेको पाइएको हो ।
गोरखापत्र दैनिकले प्रकाशित गरेको समाचार ‘क्रेडिट’ दिएर प्रकाशित गरेको थियो । विराटनगरस्थित मेट्रो न्यूरो अस्पतालमा शनिबार दिउँसो भर्ना भएका इनरुवा नगरपालिका–३ का ४५ वर्षीय प्रताप सदा मुसहरलाई १५ घण्टा शवगृहमा राखेर अन्तिम दाहसंस्कार गर्न घाट लैजान लाग्दा जीवित नै पाइएको भन्ने गोरखापत्रको समाचार पुनःप्रकाशित भएपछि अस्पताल प्रशासनले त्यसमा ध्यानाकर्षण भएको जनाएको हो ।
अस्पताल प्रशासनले उपचाररत सदाको अर्को अस्पतालमा उपचार गराउन परिवारले जिम्मा बुझेर लगेको कागजात समेत सार्वजानिक गरेको छ । बिरामी प्रताप सदाको श्रीमती सीताकुमारी ऋषिदेवले आफैं जिम्मा बुझेर बिरामी बुझेको देखिएको छ । त्यसपछि अस्पतालबाट आइतबार १२ः५२ मिनेटमा बिरामीलाई अक्सिजन लगाएर बाहिर निकालिएको सिसिटिभी फुटेज भिडियो सार्वजनिक अस्पताल प्रशासनले सार्वजनिक गरेको भिडियोमा प्रष्ट देखिन्छ ।