सुनसरी । सशस्त्र प्रहरीले सुनसरीको देवानगञ्ज गाउँपालिका–३ पाँचोसिमर क्षेत्रबाट ठूलो परिमाणमा लागुऔषध गाँजा बरामद गरेको छ। भारततर्फ तस्करी गर्ने क्रममा सशस्त्र प्रहरीको टोलीले ३१ किलो गाँजा नियन्त्रणमा लिएको हो।
सशस्त्र प्रहरी बल, बोर्डर आउट पोस्ट (बीओपी) कप्तानगञ्जको नियमित गस्तीका क्रममा तस्करहरूले गाँजाको बोरा छोडेर भागेपछि उक्त गाँजा बरामद गरिएको हो।
सशस्त्र प्रहरी बल ४ नम्बर गण हेडक्वार्टर, सुनसरीका अनुसार तस्करीमा संलग्न व्यक्ति फरार रहेका छन्। प्रहरी टोलीले घटनास्थलको प्रारम्भिक अनुसन्धानपछि तस्करीमा संलग्नको पहिचान गरी पक्राउको प्रयास जारी राखेको छ।
नेपाल–भारत खुला सिमानाका कारण देवानगञ्ज क्षेत्र तस्करीका लागि सहज मार्ग बन्ने गरेको प्रहरी स्रोतले जनाएको छ। अवैध तस्करी रोक्न सशस्त्र प्रहरीले सीमा क्षेत्रमा विशेष निगरानी अभियान सञ्चालन गर्दै आएको छ। तर, सीमामा जनशक्ति र स्रोत–साधनको अभावले तस्करी रोक्न थप चुनौती भएको सशस्त्र प्रहरी नायव उपरीक्षक बिरेन्द्र खनालले जानकारी दिए।
गाँजा तस्करी रोक्न स्थानीयवासीको सहकार्य आवश्यक रहेको प्रहरीको भनाइ छ। “स्थानीयले सूचना दिएमा प्रहरीको अभियान अझ प्रभावकारी हुनेछ,” नायव उपरीक्षक खनालले भने।
बरामद गरिएको गाँजाको बजार मूल्य लाखौँ रुपैयाँ पर्ने अनुमान गरिएको छ। तस्करी नियन्त्रणका लागि प्रहरीले सीमावर्ती क्षेत्रमा निगरानी अझ कडा बनाएको छ।
