सुनसरीको धरान उप-महानगरपालिका वडा नं. ०३ गौधारास्थित यज्ञ श्रेष्ठको सटरमा संचालनमा रहेको वनेम मेडिकलबाट ठूलो परिमाणमा लागू औषध र प्रतिबन्धित औषधीसहित दुईजना पक्राउ परेका छन्।
गोप्य सूचनाका आधारमा इलाका प्रहरी कार्यालय धरानका प्रहरी निरीक्षक दिवस कुँवरको नेतृत्वमा खटिएको टोलीले २०८१ साल माघ १४ गते राति ११:३० बजे मेडिकलमा छापा मारेको थियो। छानबिनको क्रममा मेडिकल संचालक ४१ वर्षीय सुरज वनेम र उनकी ४२ वर्षीया पत्नी टिम्पल श्रेष्ठलाई लागू औषध TRAMOL-50 का २००० चक्की र प्रतिबन्धित औषधी SPASPAIN का ७९३० चक्कीसहित नियन्त्रणमा लिइएको छ।
लागू औषध र प्रतिबन्धित औषधी मेडिकलमा लुकाइछिपाइ राखेर बिक्री वितरण भइरहेको गोप्य सूचनाको आधारमा छापा मारिएको प्रहरी कार्यालयले जनाएको छ। पक्राउ परेका दुवैजनालाई धरान प्रहरी कार्यालयमा ल्याई थप अनुसन्धान भइरहेको छ।
प्रहरीले यस घटनालाई लागू औषध नियन्त्रण ऐनअन्तर्गत कारबाही अगाडि बढाउने जनाएको छ।
