इनरुवा, असार ८ । सुनसरीको भोक्राहा नरसिंह गाउँपालिकाको १८औं गाउँ सभाबाट पत्रकार सुरेन्द्र मेहता सहित उत्कृष्ट पाँच जना कर्मचारीहरूलाई औपचारिक रूपमा सम्मान गरिएको छ।
नेपाल पत्रकार महासंघ सुनसरी जिल्ला कार्यक्रम समिति सदस्य समेत रहेका पत्रकार मेहतालाई सञ्चार सेवामार्फत समाज परिवर्तनमा पुर्याएको उल्लेखनीय योगदानका लागि दोसल्ला ओढाई, अबिरको टीका र सम्मानपत्रद्वारा सम्मान गरिएको हो।
गाउँपालिका अध्यक्ष अजमल अखतर, उपाध्यक्ष सुनिता कुमारी उराँव र प्रमुख प्रशासकीय अधिकृत विनोद अधिकारीले संयुक्त रूपमा मेहतालाई सम्मान गरेका थिए।
समाज रूपान्तरणमा सक्रिय भूमिकाका साथै, सूचना प्रवाह तथा जनचेतनामा लामो समयदेखि समर्पित मेहताको योगदानले समग्र पत्रकारिता जगतलाई प्रेरणा मिलेको भन्दै कार्यक्रममा प्रशंसा गरिएको थियो।
कार्यक्रममा अन्य उत्कृष्ट कर्मचारीहरूलाई समेत विशेष सम्मान प्रदान गरिएको थियो। पत्रकार मेहतालाई प्रदान गरिएको सम्मानले पत्रकारिता क्षेत्रको मूल्य, मर्यादा र प्रभावशीलतालाई अझ सशक्त बनाएको टिप्पणी गरिएको छ।
