सुन्दरहरैचा, मोरङ । नेपाल जस्तो कृषि प्रधान देशमा कृषि क्षेत्रको विकास नगरी समाजको समग्र रूपान्तरण सम्भव छैन भन्ने ठहर गर्दै सुन्दरहरैचा–१२ स्थित हौचामोड हरियाली विजवृद्धि कृषक सहकारी संस्था लिमिटेड ले कृषिमा आमूल परिवर्तन ल्याउने लक्ष्यसहित सहकारी अभियानलाई अगाडि बढाइरहेको छ।
संस्थाका व्यवस्थापक नेत्र प्रसाद ढकालका अनुसार सहकारीमार्फत कृषि उत्पादनमा लगानी, आधुनिक प्रविधिको प्रयोग, बजार व्यवस्थापन तथा किसानलाई सस्तो दरमा ऋण उपलब्ध गराउने कार्यक्रमलाई प्राथमिकता दिइएको छ। “प्याकिङ र बजारीकरणको योजना बनाइएको थियो, तर विविध कारणले त्यो कार्य नसकिएपछि हामीले आफैँ गाउँघरमा उन्नत जातका मकै र गहुँको विउ वितरण सुरु गर्यौँ,” उनले बताए।
विसं २०५९ सालदेखि कृषि विभाग अन्तर्गतको सेवा केन्द्रको सहकार्यमा विजवृद्धि कार्यक्रम सञ्चालन गर्दै आएको यस संस्थामा हाल १६३ जना शेयर सदस्य रहेका छन्। संस्थाको निक्षेप ६४ लाख ८७ हजार ६ सय ५८ रूपैयाँ र लगानी ८६ लाख ७८ हजार ७ सय ९२ रूपैयाँ रहेको जानकारी दिइएको छ।
संस्थाले कृषि विकास कार्यालय विराटनगरबाट प्राप्त गहुँको उन्नत विउ वितरण गर्दै किसानहरूलाई सीप, प्रविधि र बजार पहुँच प्रदान गरिरहेको छ। साथै, सरकारले सञ्चालन गर्ने स्वरोजगारमुखी कार्यक्रमहरू जस्तै सस्तो तथा सहुलियत ऋण, अनुदान, तालिम तथा गोष्ठीहरूमा कृषकहरूको सहभागीता गराउँदै आएको छ।
सहकारीमार्फत निष्क्रिय पुँजीलाई सामाजिक विकासतर्फ डोर्याउँदै कृषि क्षेत्रमा रूपान्तरण ल्याउन सकिन्छ भन्ने धारणा राख्दै ढकालले सहकारीको माध्यमबाट समुदायमा चेतना फैलाउने र उत्पादन वृद्धिमा योगदान पुर्याउने लक्ष्य राखिएको बताए।
सहकारी भनेको केवल आर्थिक कारोबार मात्र होइन, समाज परिवर्तनको सशक्त माध्यम पनि हो। कृषिमा आत्मनिर्भरता ल्याउन, स्वरोजगार सिर्जना गर्न र आधुनिक कृषि प्रणालीलाई आत्मसात गर्न सहकारीले खेलेको भूमिका अतुलनीय छ।
