रविन्द्र कुमार यादव, विराटनगर । भोक्राहा नरसिंह गाउँपालिका आर्थिक वर्ष २०८०/८१ को स्थानीय तह संस्थागत क्षमता स्वमूल्याङ्कन (LISA) को गुणस्तर परीक्षण पश्चात सार्वजनिक नतिजामा सुनसरीको भोक्राहा नरसिंह गाउँपालिका गाउँपालिकामध्ये पहिलो स्थानमा पर्न सफल भएको छ। गाउँपालिकाले ८०.५० अंक प्राप्त गर्दै जिल्लाका अन्य गाउँपालिकालाई पछि पार्दै उत्कृष्टताको उपाधि हासिल गरेको हो।
LISA मूल्याङ्कनमा शासकीय प्रवन्ध, संगठित प्रशासन, बजेट तथा योजना तर्जुमा व्यवस्थापन, वित्तीय एवम् आर्थिक व्यवस्थापन, न्यायिक कार्यसम्पादन, सेवा प्रवाह, भौतिक पूर्वाधार, सामाजिक समावेशीकरण, वातावरण संरक्षण तथा विपद् व्यवस्थापन र सहकार्य–समन्वय जस्ता सूचकहरूलाई आधार मानिएको थियो।
गाउँपालिकाले हासिल गरेको यस उपलब्धिलाई महत्वपूर्ण ठहर गर्दै अध्यक्ष अजमल अख्तर आजादले भने, “यो सफलता हाम्रो मात्र होइन सम्पूर्ण गाउँवासीको हो। आगामी दिनमा उत्कृष्ट नतिजा मात्र होइन, जनताले चाहेअनुसारका काम गरेर देखाउँछौँ।”
संघीय सरकारद्वारा हरेक वर्ष बजेट विनियोजन प्रक्रियामा स्थानीय तहलाई प्रदान गरिने सशर्त तथा नि:शर्त अनुदानको बाँडफाँडका लागि गरिने LISA मूल्याङ्कनमा यसपालि भोक्राहा नरसिंह गाउँपालिकाले जिल्लाभित्र ऐतिहासिक सफलता हासिल गरेको हो।
