रविन्द्र कुमार यादव ,विराटनगर । कोशी प्रदेश उद्योग, कृषि तथा सहकारी मन्त्रालयका सचिव डा. शरणकुमार पाण्डे फेरि विवादमा तानिएका छन् । मन्त्रालयमा सरुवा भएर आएको एक वर्ष नपुग्दै विवादमा लिप्त हुने उनको पुरानो बानी फेरि सतहमा आएको देखिन्छ ।
वाग्मती र मधेश प्रदेशमा रहँदा पनि बारम्बार विवादित बनेका सचिव पाण्डे यसपटक मन्त्रीसँगको टकरावका कारण चर्चामा आएका हुन् । गत साउन २६ गतेको मन्त्रीपरिषद् बैठकले उनलाई कृषि तथा पशुपंक्षी मन्त्रालय सिंहदरबारमा सरुवा गरेको थियो । तर, उनले रमाना नलिई विराटनगरमै अटेरी गरेकाले मन्त्रालयभित्र कामकाज ठप्प हुने अवस्था सिर्जना भएको छ ।
मन्त्रालयका स्रोतका अनुसार, सचिव पाण्डेले राजनीतिक शक्ति र शक्तिकेन्द्रको आडमा भदौ १३ गते पुनः सरुवा बदर गराएका छन् । निर्णयअनुसार उनलाई मुख्यमन्त्री तथा मन्त्रीपरिषद् कार्यालयमा खटाइए पनि उनी अझै कृषि मन्त्रालयकै गाडी प्रयोग गर्दै आएका थिए । यसैबीच मन्त्री खगेनसिं हाङमागले ‘मुख्यमन्त्री कार्यालयमा सरुवा भएका सचिव कृषि मन्त्रालयको गाडी किन प्रयोग गर्छन् ?’ भन्ने प्रश्न उठाएपछि सोमबार सचिवको गाडीको चाबी नै खोसिएको हो ।
मन्त्री हाङमागले सचिव पाण्डेलाई स्वीकार गर्न नसक्ने स्पष्ट प्रतिक्रिया दिएका छन् । “एक पटक मन्त्रीस्तरीय निर्णयबाट सरुवा भएर गइसकेका सचिव फेरि राजनीतिक दबाबमा फर्कन्छन् भने, म त्यस्तो सचिवसँग काम गर्न सक्दिन,” उनले भने ।
मन्त्रालयका कर्मचारीहरूका अनुसार, सचिव पाण्डेले मन्त्रीसँग सहयोग नगर्ने, गुटबन्दी गर्ने र नीति–कार्यक्रम अवरुद्ध गर्ने प्रवृत्ति देखाउँदै आएका छन् । यसकै कारण किसानका लागि ल्याइएका व्याज अनुदान कार्यक्रम, बजेट खर्च र ‘खोरेत रोग मुक्त गर्ने अभियान’ जस्ता महत्वपूर्ण कार्यक्रम प्रभावित भएका छन् ।
यता, सचिव पाण्डे भने मन्त्रीमाथि आसेपासे नियुक्तिको आरोप लगाउँदै आएका छन् । तर, मन्त्रालयभित्रका कर्मचारीहरू भन्छन्, “सचिवले वातावरणमै बिगारेका कारण काम गर्ने अवस्था सिर्जना हुन सकेन ।
यसरी मन्त्री र सचिवबीचको विवाद सतहमा आउँदा मन्त्रालयका नियमित कामकाज मात्र होइन, किसानका हितका योजनासमेत अवरुद्ध हुने अवस्था सिर्जना भएको देखिन्छ ।
