रविन्द्र कुमार यादव, विराटनगर । नेपाल क्रिकेट संघ (क्यान) को स्वीकृति तथा सुनसरी जिल्ला क्रिकेट संघको प्राविधिक सहयोगमा कोशी प्रिमियर लिग इभेन्ट्स म्यानेजमेन्टले प्रतियोगिता आयोजना गरेको छ। प्रतियोगितामा पूर्वेली सुपर किंग्स विराटनगर, नमुना ब्लास्टर इटहरी, दुहबी क्यापिटल्स, बालनबिउल सप्तरी टाइगर्स, एनबीएससी लायन विराटनगर, इटहरी आदर्श जायन्ट्स, र भोक्राहा नरसिंह अर्नाज गरी ७ टोली सहभागी छन्।
क्रिकेटका ठूला प्रतियोगिताहरू प्रायः शहर केन्द्रित हुने भए पनि सुनसरीको ग्रामिण बस्तीमा कोशी प्रिमियर लिग आयोजना गरिएको छ। यस प्रतियोगितामा राष्ट्रियस्तरका खेलाडीहरू पनि सहभागी रहेका छन्, जसले खेलाडीहरूलाई प्रेरणा प्रदान गरेको छ।
भोक्राहा नरसिंह गाउँपालिका वडा नं. ४ स्थित डा. खलिल आजाद खेल मैदानमा फागुन ५ गते सुरु भएको यो क्रिकेट प्रतियोगिता फागुन १७ गतेसम्म सञ्चालन हुनेछ।
स्थानीय स्तरमा यस्तो ठूलो प्रतियोगिता आयोजना गरिँदा खेलाडीहरू उत्साहित भएका छन् भने राष्ट्रियस्तरका खेलाडीहरूको प्रदर्शन प्रत्यक्ष हेर्न पाउँदा स्थानीय बासिन्दाहरू समेत खुशी भएका छन्। यो प्रतियोगिता ग्रामीण भेगमा क्रिकेटको लोकप्रियता बढाउन महत्वपूर्ण रहेको आयोजकहरूले बताएका छन्।
