रबिन्द्र कुमार यादव, काठमाडौँ । वैदेशिक रोजगारीका लागि विभिन्न देश जान खोज्ने श्रमिकले अब फोनमार्फत नै आवश्यक सबै जानकारी पाउने भएका छन्। श्रम, रोजगार तथा सामाजिक सुरक्षा मन्त्रालयले वैदेशिक रोजगारमा जाने श्रमिकलाई सही, विश्वसनीय र समयमै सूचना उपलब्ध गराउने उद्देश्यले ‘हेल्प टु हेल्प टेन सेल’ सेवा सञ्चालनमा ल्याउने भएको हो।
मन्त्रालयका अनुसार उक्त सेवामार्फत सेवाग्राहीले आफू जान लागेको देशको वर्तमान अवस्था, त्यहाँ रोजगारीका अवसर, जान मिल्ने–नमिल्ने अवस्था, लाग्ने अनुमानित खर्च, आवश्यक कागजात तथा अपनाउनुपर्ने सम्पूर्ण प्रक्रिया सम्बन्धी जानकारी प्राप्त गर्न सक्नेछन्।
यस सेवाले वैदेशिक रोजगारीमा देखिँदै आएको ठगी, गलत सूचना र अवैध प्रक्रियालाई न्यूनिकरण गर्न सहयोग पुग्ने विश्वास मन्त्रालयले व्यक्त गरेको छ। साथै, श्रमिकलाई सुरक्षित, व्यवस्थित र मर्यादित वैदेशिक रोजगारीतर्फ आकर्षित गर्ने लक्ष्य लिइएको जनाइएको छ।
मन्त्रालयका अनुसार सेवा सञ्चालनसँगै श्रमिकले अब दलाल वा अविश्वसनीय स्रोतको भर पर्नु नपर्ने र सरकारी निकायबाटै आधिकारिक जानकारी प्राप्त गर्न सक्नेछन्।
