इनरुवा । नेपाली कांग्रेसको भातृ संगठन नेपाल मुस्लिम संघ कोशी प्रदेशको दोस्रो अधिवेशनबाट इस्राइल मंसुरी पुनः सभापतिमा निर्विरोध निर्वाचित हुनुभएको छ। अधिवेशनले सचिवमा नईम अन्सारीलाई सर्वसम्मत रूपमा चयन गरेको छ। सुनसरी सदरमुकाम इनरुवामा सम्पन्न अधिवेशनमा मुस्लिम समुदायका प्रतिनिधिहरू र नेपाली कांग्रेसका नेताहरुको व्यापक सहभागिता रहेको थियो ।
अधिवेशनको क्रममा विभिन्न वक्ताहरूले मुस्लिम समुदायका हक-अधिकारका मुद्दा उठाएका थिए। भोक्राहा नरसिंह गाउँपालिका अध्यक्ष अजमल अख्तर आजादले मुस्लिम समुदायका लागि शिक्षा र समानताको सुनिश्चितता गर्नुपर्नेमा जोड दिनुहुँदै मदरशा शिक्षालाई मान्यता दिन पहल गर्न आग्रह गर्नुभयो ।
कोशी गाउँपालिका अध्यक्ष, गाउँपालिका राष्ट्रिय महासंघ कोशी प्रदेशका अध्यक्ष तथा नेपाली कांग्रेस सुनसरी क्षेत्र नम्बर ४ का सभापति ऐयुब अन्सारीले पनि मदरशा शिक्षालाई विद्यालय सरह मान्यता दिनुपर्ने आवश्यकता औंल्याउनुभयो। उहाँले विभेदका कारण मुस्लिम समुदायको सामाजिक र शैक्षिक स्तरमा असर परेको उल्लेख गर्दै, यदि समस्या समाधान नभए अधिकारका लागि आन्दोलन गर्नुपर्ने अवस्था आउन सक्ने चेतावनी दिनुभयो।
कार्यक्रममा मुस्लिम समुदायका समस्या समाधानका लागि संगठनले थप सशक्त भूमिका खेल्नुपर्ने आवश्यकता पनि चर्चा गरियो। वक्ताहरूले शिक्षा, स्वास्थ्य र आर्थिक सशक्तीकरणमा विशेष ध्यान दिनुपर्नेमा जोड दिए।
अधिवेशनले मुस्लिम समुदायका अधिकार सुनिश्चित गर्दै विविध क्षेत्रमा सकारात्मक परिवर्तन ल्याउन संगठनलाई अझ प्रभावकारी बनाउने प्रतिबद्धता जनाएको छ। इस्राइल मंसुरी र नईम अन्सारीको नेतृत्वमा नेपाल मुस्लिम संघ कोशी प्रदेशले आगामी दिनमा समुदायको समग्र विकासका लागि प्रभावकारी कदम चाल्ने अपेक्षा गरिएको छ ।
