जयकृष्ण यादव । इनरुवा
इनरुवा, असार ७ गते । सुनसरीका विभिन्न स्थानीय तहका उत्कृष्ट महिला स्वास्थ्य स्वयमसेविकाहरु सम्मानित भएका छन् । प्रदेश १ सरकार, स्वास्थ्य निर्देशनालय स्वास्थ्य कार्यालय सुनसरीले वडा तथा गाउँ तहमा रहेर न्यून सुविधामा बालबालिकादेखी महिलासम्मको स्वास्थ्यका लागि उत्कृष्ट काम गर्नेहरु मध्ये १२ जना महिला स्वास्थ्य स्वयमसेविकाहरुलाई सम्मानित गरेको जनाएको छ ।
प्रत्येक स्थानीय तहबाट एक जनाका दरले १२ जना उत्कृष्ट महिला स्वास्थ्य स्वयमसेविकाहरुलाई सम्मान गरेको स्वास्थ्य प्रमुख सागर प्रसाईले जानकारी दिनुभयो । प्रसाईका अनुसार जिल्लाको धरान उपमहानगरपालिकाबाट बृन्दा राई, इटहरी उपमहानगरपालिकाबाट मैमुना खातुन, इनरुवा नगरपालिकाबाट सृजना मेहता, दुहवी नगरपालिका गुणसुन्दरी कार्की, बराहक्षेत्रबाट पुनम पाल, रामधुनी नगरपालिकाबाट कल्पना चौधरी, गढी गाउँपालिकाबाट सुमित्रा माझी, बर्जु गाउँपालिकाबाट बिनादेवी चौधरी, देवानगञ्ज गाउँपालिकाबाट कविता मेहता, हरिनगर गाउँपापिलकाबाट बबितादेवी मण्डल, कोशी गाउँपालिकाबाट शान्तीदेवी मेहता र भोक्राहा नरसिंह गाउँपालिकाबाट चन्दा भगतलाई उत्कृष्ट महिला स्वास्थ्य स्वयमसेविका सम्मानबाट सम्मानित गरेको हो । जिल्लाको १२ पालिकाका १२४ वटा वडामा कार्यरत एक हजार १८३ जना स्वयमसेविका मध्ये १२ जनालाई सम्मान गरिएको हो ।
प्रदेश १ सरकारका स्वास्थ्य मन्त्री जयराम यादव , जिल्ला समन्वय समितिका उपप्रमुख कमला खतिवडा र इटहरी उपमहानगरपालिकाका प्रमुख हेमकर्ण पौडेल लगायतले महिला स्वास्थ्य स्वयमसेविकाहरुको सम्मान गर्नुभयो । सम्मानितहरुलाई जनही १२ हजार ७०० रुपियाँ, सम्मान पत्र, दोसल्ला, खादा, फुलमाला र अविरका साथ सम्मान गरिएको थियो ।
जिल्ला समन्वय समितिका उपप्रमुख कमला खतिवडाले स्वास्थ्य क्षेत्र सुधारका लागि महिला स्वास्थ्य स्वयमसेविकाहरुको महत्वपूर्ण भूमिका रहेको र सम्मानित हुनुभएकोमा बधाई दिनुभयो ।
इटहरीका प्रमुख हेमकर्ण पौडेलले नेपालको ग्रामीण क्षेत्रमा प्राथमिक स्वास्थ्य क्षेत्रमा महिला स्वास्थ्य स्वयमसेविकाहरुको महत्वपूर्ण भूमिका रहेको भन्दै उनीहरुका लागि आवश्यक प्रोत्साहन लगायतका सेवा सुविधा थपका लागि उपमहानगरपालिकाले पहल गर्ने बताउनुभयो ।
महिला स्वास्थ्य स्वयमसेविका सुमित्रा माझीले कठिन अवस्थामा पनि घरघरमा पुगेर सेवा दिएको भन्दै आफुहरुका लागि राज्यले जीवनयापनका लागि ध्यान दिनुपर्ने माग गर्नुभयो ।
१, सुनसरीको इटहरीमा आयोजित स्वास्थ्य स्वयमसेविका सम्मान कार्यक्रमलाई सम्बोधन गर्नुहुदै प्रदेश १ का स्वास्थ्य मन्त्री जयराम यादव ।
तस्विर ः जयकृष्ण यादव । इनरुवा
