काठमाडौं । अमेरिकाले नेपालका ऐतिहासिक र सांस्कृतिक सम्पदाहरू फिर्ता गर्ने घोषणा गरेको छ। करिब ४१ करोड रुपैयाँ बराबर मूल्यांकन गरिएका यी सम्पदाहरू विभिन्न समयमा तस्करी भएर अमेरिका पुगेका थिए।
नेपालका विभिन्न मठ-मन्दिर, संग्रहालय तथा पुरातात्त्विक स्थलबाट चोरिएका मूर्तिहरू तथा अन्य सांस्कृतिक सामग्रीहरू अमेरिकास्थित अनुसन्धान निकायहरूको पहलमा फिर्ता गरिने भएका हुन्। अमेरिकी अधिकारीहरूले यी सम्पदाहरू नेपालको सम्पत्ति भएकाले यथाशीघ्र फिर्ता गर्ने प्रतिबद्धता व्यक्त गरेका छन्।
संस्कृति, पर्यटन तथा नागरिक उड्डयन मन्त्रालयले सम्पदाहरू फिर्ता ल्याउनका लागि आवश्यक प्रक्रिया अगाडि बढाइसकेको जनाएको छ। यसअघि पनि अमेरिका र अन्य देशहरूले नेपाललाई चोरी भएका सम्पदा फिर्ता गरिसकेका छन्।
नेपाल सरकारले सम्पदा तस्करी रोकथाम तथा हराएका सम्पदाहरू फिर्ता ल्याउने पहललाई अझ प्रभावकारी बनाउने प्रतिबद्धता जनाएको छ।
