इनरुवा । सुनसरीको जिल्ला समन्वय समितिको सातौं जिल्ला साधारण सभा आज सम्पन्न भएको छ। प्रमुख अतिथि सुनसरी क्षेत्र नं. ४ कोशी प्रदेशका सांसद हाजि इसराइल मन्सुरी, जिल्ला समन्वय अधिकारी भूपध्वज थापा, र समन्वय प्रमुख राजन मेहता लगायत अतिथिहरुको सहभागीता रहेको कार्यक्रममा हरिनगर गाउँपालिकाले उल्लेखनीय सफलता प्राप्त गरेको छ।
संघीय मामिला तथा सामान्य प्रशासन मन्त्रालयद्वारा आ.व. २०७५/८० को स्थानिय तह संस्था गुणस्तरीय परीक्षणको नतिजा अनुसार, सुनसरी जिल्लाका १२ स्थानिय तहको सूचीमा हरिनगर गाउँपालिकाले ७५.५० अंक प्राप्त गरेर दोस्रो स्थान हासिल गरेको छ। पहिलो स्थानमा इटहरी उपमहानगरपालिका र तेस्रो स्थानमा रामधुनि नगरपालिका रहेका छन्।
कार्यक्रममा हरिनगर गाउँपालिकाका अध्यक्ष गफार अंसारीले, आगामी दिनमा थप सुधार र जनसेवा प्रवाहमा प्रभावकारी भूमिकामा रहन विश्वास जनाउँदै जिल्ला समन्वय समितिलाई शुभकामना व्यक्त गरे। उनले अझ सुधारका लागि प्रतिवद्धता व्यक्त गर्दै पहिलो स्थानमा आउने लक्ष्य राखेका छन्।
