सुनसरी । बढ्दो भ्रष्टाचार र घट्दो सदाचारलाई रोक्न सुनसरीको भोक्राहा नरसिंह गाउँपालिकामा स्थानीय तहको भूमिकाबारे छलफल गर्न विशेष कार्यक्रम सम्पन्न भएको छ।
अख्तियार दुरुपयोग अनुसन्धान आयोग, इटहरीको समन्वयमा आयोजित कार्यक्रममा सहभागी सरोकारवालाहरूले भ्रष्टाचार न्यूनीकरणका लागि आम नागरिक, नागरिक समाज, कर्मचारी, र जनप्रतिनिधिहरू इमान्दार र जिम्मेवार हुनुपर्नेमा जोड दिएका छन्।
कार्यक्रमको अध्यक्षता अख्तियार दुरुपयोग अनुसन्धान आयोग इटहरीका प्रहरी नायब उपरीक्षक खगेन्द्र बहादुर खड्काले गरेका थिए भने गाउँपालिकाका अध्यक्ष अजमल अख्तर आजाद प्रमुख अतिथि रहेका थिए ।
अध्यक्ष आजादले पारदर्शी सेवा प्रवाह र उपलब्ध स्रोत साधनको सही उपयोगमार्फत भ्रष्टाचार नियन्त्रण गर्न स्थानीय तहको भूमिका महत्त्वपूर्ण रहेको बताउनुभयो। उपाध्यक्ष सुनिताकुमारी उराँवले समुदायमा सचेतना अभिवृद्धि गर्दै भ्रष्टाचारमुक्त समाज निर्माण गर्न गाउँपालिकाले विशेष पहल गरिरहेको जानकारी दिनुभयो।
यसैक्रममा, प्रमुख प्रशासकीय अधिकृत सुवर्ण घिमिरेले जनप्रतिनिधि र कर्मचारीहरूले कानुनको परिधिभित्र रहेर काम गर्नुपर्ने आवश्यकता औंल्याउनुभयो।
कार्यक्रममा गाउँपालिकाका वडाध्यक्षहरूले भ्रष्टाचारमुक्त गाउँपालिका निर्माणका लागि आफ्नो प्रतिबद्धता व्यक्त गरेका छन्।
