सुनसरीको रामधुनी नगरपालिका ७ कुमरखतको पञ्चायत माध्यमिक विद्यालयमा सामाजिक लेखाजोखा कार्यक्रम सम्पन्न भएको छ । प्लान इन्टरनेश्नल नेपालको सहयोग तथा ग्रामिण समाज उत्थान केन्द्र(आरएसडी) सुनसरीको आयोजना र रामधुनी नगरपालिकाको समन्वयमा लैगिंक रुपान्तरणमुखी समाबेशी शिक्षा सिकाई परियोजना अन्तरगत सामाजिक लेखाजोखा कार्यक्रम सम्पन्न भएको हो । परियोजना अन्तरगतका कार्यक्रमको प्रभावकारीता तथा त्यसको लाभका बारेमा सरोकारबालाहरुको बीचमा सामाजिक लेखाजोखा कार्यक्रम सम्पन्न भएको आरएसडीसिका विरेन्द्र सुतिहारले जानकारी दिनुभयो ।
सुतिहारका अनुसार संस्थाले आ.ब २०७८÷०७९ मा प्लान नेपालको सहयोग तथा ग्रामिण समाज उत्थान केन्द्र(आरएसडी) सुनसरीको आयोजना र रामधुनी नगरपालिकाको समन्वयमा लैगिंक रुपान्तरणमुखी समाबेशी शिक्षा सिकाई परियोजना अन्तरगत पञ्चायत माध्यमिक विद्यालयमा बालमैत्री कक्षाकोठा निर्माण, शिक्षकलाई तालिम, महिनाबारी आराम कक्ष निर्माण तथा संचालन, विद्यालयको झ्याल ढोका व्यवस्थापन , प्रारम्भिक बाल कक्षाको लागि टिभी ३२ इन्चको स्मार्ट एलईडी, प्रारम्भिक बाल कक्षाहरुमा खेल सामग्री सहयोग गरेको जनाएको छ । सोही विभिन्न प्रमसख ६ वटा कार्यक्रमको प्रगति विवरण र अन्य कार्यक्रमको प्रभाव समेत सार्वजनिक गर्दै सामाजिक लेखाजोखा कार्यक्रम सम्पन्न गरेको सुतिहारले बताउनुभयो ।
कार्यक्रममा आयोजक संस्थाका जिल्ला कार्यक्रम अधिकृत शिखा किरण यादवले आरएसडीसीको कार्यक्रमको प्रभाव र त्यसबाट बालबालिकाहरुमा देखिएको साकारात्मक परिर्वतनका बारेमा आफ्नो कुरा राख्नुभएको थियो ।
पञ्चायत माध्यमिक विद्यालयका व्यवस्थापन समिति अध्यक्ष युवराज कटुवालले विद्यालयको कक्षा कोठा अस्थव्यस्त रहेकोमा बाल विकासदेखी कक्षा ३ सम्मको कक्षा कोठामा बालमैत्री कार्पेटदेखी चकडीसम्म खेल सामग्री देखी एलईडीसम्मको सहयोग गरेको निकै राहत मिलेको बताउनुभयो ।
त्यसैगरी विद्यालयका पूर्व प्रधानाध्यापक तथा विधालयका सल्लाहकार गंगा प्रसाद राउतले सामाजिक विकास र बाल विकासको क्षेत्रमा आरएसडीसीको कार्यक्रमले निकै प्रभाव छाडेको बताउनुभयो ।
बाल समूहका अध्यक्ष अनिष कुवरले विद्यालयमा महिनाबारी आराम कक्ष निर्माण भएपछि महिनाबारीका समयमा कक्षा छोड्ने दरमा कमी आएको बताउनुभयो ।
कार्यक्रममा स्थानीय सामुदायिक संस्थाका सदस्यहरु, विद्यालय व्यवस्थापन समितिका सदस्यहरु, शिक्षकहरु तथा विद्यालयका शिक्षक प्रतिनिधीहरु, बाल क्लबमा पदाधिकारीहरु, बालसंरक्षण समितिका पदाधिकारी, स्थानीय अभिभावकहरुको उपस्थिति रहेको थियो । संस्थाले आफूले गरेको कामको सामाजिक रुपमा विद्यालयमा संचालन गरेको काम उदाहरणीय रहेको र आगामी दिनमा यस्तो कामलाई निरन्तरता दिन आवश्यक रहेको प्रधानाध्यापक शंकर लुईटेललले बताउनुभयो । लुईटेलले संस्थालाई सामाजिक जिम्मेवारीका साथ कार्य गरेकोमा सम्मान समेत गर्नुभएको थियो । कार्यक्रमको सहजीकरण जयकृष्ण यादवले गर्नुभएको थियो ।
