गुल्मी । छत्रकोट गाउँपालिका–५ खज्र्याङ्गका ४० वर्षीय विष्णु भण्डारीले एकै सिजनमै ३० लाख रुपैयाँ बराबरको काँक्रा बिक्री गरेका छन्। विदेश जाने मोह नजागी आफ्नै गाउँको उर्वर जमिनमा पसिना बगाउँदै उनले कृषि पेशालाई समृद्धिको आधार बनाएका छन्।
भण्डारीले कृषि क्षेत्रमा १० वर्ष बिताइसकेका छन्। सुरुमा कुखुरा पालन र मासु व्यवसायबाट सुरु गरेका उनले पछिल्ला वर्षमा काँक्रा उत्पादनलाई मुख्य व्यवसाय बनाएका हुन्। गत वर्ष दुई हजार काँक्राका बोट रोपेका भण्डारीले यस वर्ष दस हजार बोट लगाएका छन्।
बेमौसमी उत्पादन भएकाले मूल्य पनि राम्रो पाइरहेका छन्। उनका अनुसार प्रति किलो काँक्रा फर्मबाटै सय रुपैयाँमा बिक्री भइरहेको छ। “बोट नै दश हजार छन्, राम्रो उत्पादन र मूल्य भएकाले ३० लाख ढुक्कले कमाउँछु”, भण्डारीले बताए।
उनको पूर्णिमा कृषि फर्ममा काँक्रासँगै लौका, घिरौंला, खर्बुजा, फर्सी लगायतका तरकारी उत्पादन हुँदै आएका छन्। अहिले उनले तीन लाख रुपैयाँको लौका बिक्री हुने अनुमान गरेका छन्।
लगानीका हिसाबले करिब ५० लाख रुपैयाँ कृषि र कुखुरा पालनमा लगाइसकेका छन्। साथै, दुईवटा पोखरीमा माछा पालनसमेत गर्दै आएका छन्, जहाँबाट तीन–चार क्विन्टल माछा उत्पादनको सम्भावना छ।
कृषिबाट मात्रै भण्डारीको परिवार सन्तुष्ट छैन, फर्ममा दैनिक चार जनाले रोजगारी समेत पाएका छन्। “सिजनकै बेला एउटै बालीमा सबैले लगाउँदा बजार र मूल्य दुवै घट्छ। मैले बेमौसमी उत्पादन गर्ने रणनीति अपनाएको हुँ”, उनले भने।
कृषिमा कुनै औपचारिक अध्ययन नगरेका भण्डारीले सीप, अनुभव र मेहनतको भरमा गाउँमै बस्दै आत्मनिर्भरता हासिल गरेका छन्। उनी गाउँमै बसेर रोजगारी सिर्जना गर्ने प्रेरणादायी उदाहरण बनेका छन्।
