इटहरी । कोशी प्रदेश पर्यटन वन तथा वातावरण मन्त्रालयको आयोजनामा कोशी प्रदेश पर्यटन वर्ष २०८२ सम्बन्धी नीतिगत अन्तरक्रिया कार्यक्रम सम्पन्न भएको छ। कार्यक्रम कोशी प्रदेशका मुख्यमन्त्री हिकमत कार्कीको अध्यक्षतामा इटहरी उपमहानगरपालिका–२ स्थित रोयल रिसोर्टको सभाहलमा आयोजना गरिएको हो।
कार्यक्रममा कोशी प्रदेश आन्तरिक मामिला तथा योजना मन्त्री राम बहादुर मगर, पर्यटन वन तथा वातावरण मन्त्री सदानन्द मण्डल, मुख्यमन्त्री कार्यालयका राज्य मन्त्री सृजना राई, कृषि उद्योग तथा सहकारी मन्त्री खगेनसिंह हाङगम, पर्यटन वन तथा वातावरण सचिव विशाल घिमिरे, कोशी प्रदेश प्रहरी कार्यालय प्रमुख राजन अधिकारीसहित विभिन्न सरकारी निकायका प्रतिनिधिहरूको सहभागिता रहेको थियो।
कार्यक्रममा प्रदेश सरकारले पर्यटन वर्ष २०८२ लाई सफल बनाउन आवश्यक नीतिगत योजना, पर्यटकीय सम्भाव्यता तथा पूर्वाधार विकासका विषयमा गहन छलफल गरिएको थियो। कोशी प्रदेशका पर्यटकीय क्षेत्रहरूको पहिचान गर्दै दीर्घकालीन रणनीति निर्माणका लागि विभिन्न क्षेत्रका विज्ञहरूसँग परामर्श भइरहेको पर्यटन मन्त्रालयले जनाएको छ।
सहभागी वक्ताहरूले निजी क्षेत्रसँग सहकार्य गरी विदेशी पर्यटकहरू भित्र्याउने रणनीति अपनाउनु आवश्यक रहेको औंल्याए। साथै, कोशी प्रदेशलाई आकर्षक पर्यटकीय गन्तव्यका रूपमा स्थापित गर्न आवश्यक पूर्वाधार विकास, प्रचार-प्रसार, तथा सहज लगानी वातावरण निर्माणमा प्रदेश सरकारले विशेष ध्यान दिनुपर्नेमा जोड दिइयो।
