सुनसरी । कोशी गाउँपालिका–४ स्थित कोशी कटान क्षेत्रको ट्राफिक प्रहरी चेकपोष्टमा गत शुक्रबार भएको घटनाप्रति कोशी गाउँपालिका अध्यक्ष ऐयुब अंसारीले स्पष्टीकरण दिएका छन्।
उक्त घटनालाई सामाजिक सञ्जालमार्फत उनको राजनीतिक जीवनसँग जोडेर प्रचारप्रसार हुन थालेपछि अध्यक्ष अंसारीले सोमबार एक प्रेस विज्ञप्ति जारी गर्दै घटनाको वास्तविकता सार्वजनिक गरेका हुन्।
अध्यक्ष अंसारीका अनुसार सो चेकपोष्टमा स्थानीय बासिन्दाले बारम्बार सास्ती खेप्नु परेको गुनासो आइरहेका थिए। घटनाको दिन स्थानीय र ट्राफिक प्रहरीबीच विवाद भएको जानकारी पाएपछि जनप्रतिनिधिको हैसियतले उनी उक्त स्थानमा पुगेका थिए।
“त्यहाँ पुगेपछि चेकपोष्टमा कार्यरत दुई जना ट्राफिक प्रहरीद्वारा स्थानीयलाई दुर्व्यवहार र सास्ती दिने गरेको गुनासो पुष्टि भएकाले उनीहरूसँग छलफल गर्ने क्रममा केही चर्काचर्की भएको हो,” प्रेस विज्ञप्तिमा उल्लेख छ।
अध्यक्ष अंसारीले उक्त घटनामा प्रहरी संगठनप्रति कुनै व्यक्तिगत द्वेष नरहेको स्पष्ट पार्दै भनेका छन्, “प्रहरी संस्था प्रतिको मेरो उच्च सम्मान छ। गलत गर्ने व्यक्तिप्रति मात्र आपत्ति जनाइएको हो।”
साथै उनले घटनाका क्रममा जनप्रतिनिधिको भूमिकामा रहँदा बोल्न नहुने शब्द प्रयोग भएकोप्रति आत्मआलोचना पनि गरेका छन्।
अध्यक्ष अंसारीले सामाजिक सञ्जाल प्रयोगकर्तालाई सत्य तथ्य नबुझी हतारमा प्रचार नगर्न र आफ्नो राजनीतिक जीवनसँग यस घटनालाई जोडेर गलत सन्देश नपठाउन सार्वजनिक अपिल गरेका छन्।
