विराटनगर । पर्यटन, वन तथा वातावरण मन्त्रालय, कोशी प्रदेश, विराटनगरले आज ५२ औं विश्व वातावरण दिवस विविध कार्यक्रम गरी मनाएको छ। ‘प्लाष्टिक प्रदूषण न्यूनीकरण, हाम्रो दायित्व’ भन्ने मूल नारासहित आयोजना गरिएको कार्यक्रममा मन्त्री सदानन्द मण्डल ,प्रदेश सचिव विशाल घिमिरेको प्रमुख उपस्थिति रहेको थियो।
कार्यक्रम बिहान ७ बजे विराटनगरको महेन्द्र चोकबाट सुरु भएको र्यालीसहित प्रारम्भ भएको थियो। उक्त र्याली पंचमुखी हनुमान मन्दिर, काली मन्दिर, विराटनगर महानगरपालिका कार्यालय हुँदै आदर्श विद्यालयसम्म पुगेको थियो। र्यालीमा विभिन्न विद्यालयका करिब ५ सय विद्यार्थी, GOALS FOUNDATION का प्रतिनिधि तथा मन्त्रालयका कर्मचारीहरुको उल्लेखनीय सहभागिता रहेको थियो।
विद्यालय परिसरमा आयोजित औपचारिक कार्यक्रममा प्रदेश सचिव घिमिरेले प्लाष्टिक प्रदूषणले मानव स्वास्थ्य, जीवजन्तु र वातावरणमा पार्ने नकारात्मक असरबारे सचेत गराउँदै प्लाष्टिकको प्रयोग कम गर्न, पुनःप्रयोग गर्न प्रेरित गरे। सचिव घिमिरेले नारा केवल औपचारिकताका लागि नभई व्यवहारमा उतार्न सबैलाई आग्रह गरे।
त्यसपछि सहभागी विद्यार्थी, कर्मचारी तथा GOALS FOUNDATION का सदस्यहरूले विद्यालय परिसरमा वृक्षारोपण गरे। साथै, विद्यार्थी र सफाइ कर्मचारीहरूले प्लाष्टिकजन्य फोहोर संकलन गरेका थिए।
कार्यक्रमका क्रममा वातावरण सम्बन्धी चेतनामूलक नाटक प्रस्तुत गरिनुका साथै ‘नयाँ नेपाल’ नामक संस्थासँगको सहकार्यमा जोगबनी–विराटनगर राजमार्ग खण्डमा बाँसको घेराबारासहित ५० वटा बोटको वृक्षारोपण गरिएको थियो।
विश्व वातावरण दिवस अवसरमा गरिएको यस्ता कार्यक्रमहरूले नागरिकहरूमा वातावरण संरक्षणप्रति चेतना अभिवृद्धि हुने अपेक्षा गरिएको छ।
