सुनसरीको कोसी गाउँपालिकाले कबडी खेलाडीलाई ९ औं राष्ट्रिय खेलकुद प्रतियोगिताको लागि विदाई गरेको छ । असोज २८ गतेदेखी ३१ गतेसम्म पोखरामा हुने ९ औं राष्ट्रिय खेलकुद प्रतियोगिता अन्तरगत कबडी खेलको लागि प्रदेश १ को खेलाडी टिममा सहभागि हुदै भाग लिन जाने भएकाले विदाई गरिएको हो ।
कोशी गाउँपालिका वडा नम्बर ३ को राष्ट्रिय मावि शोभनपुरकी कक्षा ११ मा अध्ययनरत्त छात्रा जानकी उराँवलाई राष्ट्रिय कबड्डी खेलाडीका रुपमा छनौट भएकोमा उहाँलाई ११ हजार रुपियाँ सहित सम्मान गर्दै विदाई गरिएको छ । छात्रा कबडी खेलाडी जानकी उराँवलाई ९ औं राष्ट्रिय खेलकुद प्रतियोगिताको लागि कोसी गाउँपालिका अध्यक्ष ऐयुब अन्सारीको प्रमुख आतिथ्यतामा विदाई गरिएको कार्यक्रम सञ्चालक गाउँपालिकाका सामाजिक शाखा प्रमुख राजकिसोर मेहताले जानकारी दिनुभयो । विदाई कार्यक्रममा कोशी उपाध्यक्ष अनिता यादव, नेपाली काग्रेंस सुनसरी क्षेत्र नम्बर ४ (क) बाट प्रदेशसभा सदस्यका उम्मेदवार सदानन्द मण्डल, कोशी वडा नम्बर ३ का वडा अध्यक्ष सुलेमान मन्सुरी, वडा नम्बर २ का वडा अध्यक्ष ध्यानी उराँव,राष्ट्रिय मावि शोभनपुरका प्रधानाध्यापक हरेकृष्ण राउत लगायतले उराँवलाई बिदाई गर्नुभएको थियो । त्यसैगरी प्रदेशस्तरीय प्रतियोगितामा गोल्ड मेडल प्राप्त गरेका उराँव सहित गंगा सरदारलाई पुरस्कृत गरेको जनाएको छ । कार्यक्रममा कवडी प्रशिक्षक तरुण कुमार यादवलाई पनि सम्मान गरेको थियो । कोसी गाउँपालिकाले दुई वर्षदेखी खेलाडीका लागि प्रशिक्षण र प्रतियोगिताहरु गर्दै आएकाले राष्टिय स्तरमा खेल्न पाउनु पालिकाकै गौरवको कुरा भएको कोशी अध्यक्ष एयुव अंसारीले बताउनुभयो । कार्यक्रममा सयौ विधार्थी तथा सरोकारबालाहरु सहभागिता रहेको थियो भने राष्टिय मावि शोभनपुरका विद्यालय व्यवस्थापन समितिका अध्यक्ष समसुल मंसुरीको अध्यक्षमा सम्पन्न भएको थियो ।
