भोक्राहा । सुनसरीको भोक्राहा नरसिंह गाउँपालिका –७ कालीथान मेलामा तीनदिने कुस्ती प्रतियोगिता सम्पन्न भएको छ । कालीथान मेला व्यवस्थापन समितिको आयोजनामा स्थानीय धान खेलमैदानमा सम्पन्न भएको प्रतियोगितामा नेपाल र भारतका कुस्ती खेलाडीको सहभागिता थियो ।
प्रतियोगितामा ५० केजीदेखी १२० केजीसम्म तौल उमेर समूहका मोन्टी पहलमान, रबी पहलमान, कालु पहलमान, रितेश पहलमान, सोभितकुमार यादव, सतिशकुमार यादव, लक्की थापा, भरतकुमार, बाबा लाडी, ओमकार पहलमान, समसेर पहलमान, बिक्की पहलमान, रामु पहलमान, सोनु पहलमान, रिजवान गणी, मोहित पहलमान, कल्कु पहलमान, भेसा पहलमानसहित १९ जोडीमा ३८ खलिफाहरुले कुस्ती खेल्नुभएको थियो ।
प्रतियोगितामा भारतको राजधानी नयाँ दिल्लीसहित बनारस, जम्मुकस्मिर, विहार, लखनौ, राजस्थान, पञ्जाबसहितका राज्यका र नेपालको बारा, पर्सा, सुनसरी र सप्तरीका खलिफाहरुले कुस्ती प्रदर्शन गर्नुभएको थियो ।
प्रतियोगिताका प्रमुख अथिति एवम् पूर्व उपप्रधानमन्त्री तथा हाल जनता समाजवादी पार्टीका अध्यक्ष उपेन्द्र यादवले मधेसको मौलिक पहिचानसँग र संस्कृतिसँग जोडिएको तर लोपोन्मुख अवस्थामा पुगेको कुस्ती खेलको संरक्षण गर्न प्रतियोगिता आयोजना गरिएकोमा खुसी व्यक्त गर्नुभयो ।
कार्यक्रममा भोक्राहा नरसिंह गाउँपालिकाका अध्यक्ष अजमल अख्खर आजाद, भोक्राहा नरसिंह गाउँपालिका २ का वडा अध्यक्ष आलम अन्सारी, ४ का वडा अध्यक्ष हारुन अन्सारी, ६ का वडा अध्यक्ष सेराजुद्धिन अन्सारी र ७ का वडा अध्यक्ष बौवालाल यादव लगायतका जनप्रतिनिधि र स्थानीय नेताहरुको उपस्थिति थियो ।
कार्यक्रममा नेपाल र भारतका नाम चलेका खलिफाहरुको उपस्थिति रहेकोमा उत्सकृत १९ खेलाडीलाई जनही पाँच हजारका दरले पुरस्कार वितरण गरेको आयोजक समितिका अध्यक्ष सुरेन्द्र यादवले जानकारी दिनुभयो । तीन दिनमा ७० हजारभन्दा बढी दर्शकले कुस्ती खेल अवलोकन गरेको आयोजक समितिका अध्यक्ष यादवले बताउनुभयो ।
