रविन्द्र कुमार यादव,
विराटनगर, पुस २८ गते । सुनसरीको सदरमुकाम इनरूवा नगरपालिकाको १४ औं अधिवेशन तथा नगर सभा आइतबार सम्पन्न भएको छ। चालु आर्थिक वर्षको पहिलो पाँच महिनामा भएका कामको समीक्षासहित बजेट, नीति, र कार्यक्रमको संशोधन र सुधारका लागि यो अधिवेशन गरिएको हो।
नगर सभामा प्रमुख प्रशासकीय अधिकृत डिल्लीराज निरौलाले १३ औं अधिवेशनबाट स्वीकृत बजेट, नीति तथा कार्यक्रमका उपलब्धिहरूको प्रतिवेदन प्रस्तुत गर्नुभयो। उहाँका अनुसार चालु आर्थिक वर्षमा आय ४५ प्रतिशत र व्यय २७.९२ प्रतिशत रहेको छ।
सभाले ६ वटा कानुन स्वीकृत गरेको छ, जसमा श्र्रोत पुनः प्राप्ति केन्द्रबाट निस्कने सामग्री बिक्री सम्बन्धी कार्यविधि, संघ/संस्था दर्ता तथा नवीकरण सम्बन्धी कार्यविधि, आर्थिक सहायता कार्यविधि, छात्रवृत्ति वितरण कार्यविधि, सहकारी नियमावली लगायतका कानुनहरू समावेश छन्।
हालसम्म २६ वटा योजनाका ठेक्का सम्झौता भइसकेका छन् भने केही कार्य सम्पन्न भएको जानकारी नगर प्रमुख केदार भण्डारीले दिनुभयो ।
उपप्रमुख विनिता मेहता, वडा अध्यक्ष, र सदस्यहरूले विकासका गतिविधिमा तीव्रता, भौतिक पूर्वाधार निर्माण, पारदर्शिता, र कर प्रणाली सुधारको आवश्यकता रहेको सुझाव दिए।
इनरुवा १ का वडा अध्यक्ष प्रमोद पोखरेलले विकासमा समानुपातिक ध्यान दिनुपर्ने बताउनुभयो। इनरुवा ४ का वडा अध्यक्ष बौवालाल मेहताले पर्यटन प्रवर्द्धन र खोला नियन्त्रणमा ध्यान दिनुपर्नेमा जोड दिनुभयो। इनरुवा ९ का वडा अध्यक्ष बसिरमुद्धिन मंसुरी र इनरुवा १० का वडा अध्यक्ष खलिल मियाँले बबिया-जल्पापुर सडक खण्डको समस्या समाधान र बाटो कालोपत्रे गर्ने माग राख्नुभयो।
यस पटकको अधिवेशन इनरुवा नगरपालिका ८ डुम्राहास्थित श्र्रोत पुनः प्राप्ति केन्द्र (डम्पिङ साइट) मा आयोजना गरियो। यसले डम्पिङ साइटलाई फोहर व्यवस्थापनको प्रभावकारी मोडेलका रूपमा प्रस्तुत गरेको नगर प्रमुखले बताउनुभयो।
नगरपालिकाले प्राप्त सुझावहरूलाई कार्यान्वयनमा लैजाने प्रतिबद्धता जनाउँदै, सभा थप निर्णयका लागि भोलीसम्मकालागि स्थगित गरेको छ।
