विराटनगर । सुनसरीको देवानगञ्ज गाउँपालिकाको १६औं गाउँसभा अध्यक्ष बेचन प्रसाद मेहताको अध्यक्षतामा सम्पन्न भएको छ। उपाध्यक्ष विभा कुमारी यादव, प्रमुख प्रशासकीय अधिकृत सुधिर साफी, र अन्य सभा सदस्यहरूको उपस्थितिमा गाउँसभा सम्पन्न भएको हो।
सभामा उपाध्यक्ष यादवले १५औं गाउँसभाबाट पारित बजेट संशोधन, करार/ज्यालादारी कर्मचारीको म्याद थप, कार्यविधि तथा निर्देशिका अनुमोदन, बेरुजु सम्परीक्षण, र कार्यपालिका निर्णयहरूको अनुमोदनसम्बन्धी प्रस्तावहरू प्रस्तुत गरिन्। ती प्रस्तावहरू छलफलपछि सर्वसम्मत रूपमा पारित गरियो।
गाउँसभामा जनप्रतिनिधिहरूले गाउँपालिकाको सामाजिक, आर्थिक, भौतिक, शैक्षिक, र सांस्कृतिक विकासका पक्षमा आफ्नो धारणा राख्दै, आगामी योजनाहरू सफल बनाउन सबै पक्षको सहकार्यको आवश्यकता औँल्याए।
गाउँपालिका अध्यक्ष मेहताले प्रगति, चुनौती, र अवसरहरूको समीक्षा गर्दै, विकास र समृद्धिका लागि एकता र सहयोग आवश्यक रहेको बताए। प्रमुख प्रशासकीय अधिकृत साफीले अनुमोदित कार्यक्रमहरू कार्यान्वयन गर्ने प्रतिबद्धता व्यक्त गरे।
सभामा स्थानीय नागरिकहरूले विभिन्न विषयमा आफ्ना सुझाव र सल्लाह प्रस्तुत गर्दै गाउँपालिकाको समग्र विकासमा जोड दिए।
सभाले संशोधित बजेट र नीति कार्यक्रम अनुमोदन गर्दै आगामी विकास योजनाहरूको आधार तयार पारेको छ।
