सुनसरी, माघ १० गते,
रविन्द्र यादव । कोशी प्रदेशका मुख्यमन्त्री हिक्मतकुमार कार्कीले भारतीय पर्यटकलाई नेपाल भ्रमणका क्रममा पर्ने सबै असजिलो र समस्याहरू हटाउन सरकार प्रतिबद्ध रहेको बताएका छन्।
सुनसरीको कोशी टप्पुमा बिहीबार कोशी प्रदेशका मुख्यमन्त्री हिक्मत कुमार कार्कीको प्रमुख आतिथ्य र पर्यटन, वन तथा वातावरण मन्त्री सदानन्द मण्डलको अध्यक्षतामा सम्पन्न बैठकमा कोशी प्रदेशका ५७५ सदस्यीय मूल आयोजक समितिले पर्यटनको सम्भावना र चुनौतीबारे बहस गरी विभिन्न पदाधिकारीहरूको उपस्थितिमा पर्यटन वर्ष २०८२ का लागि महत्वपूर्ण निर्णयहरू गरियो । आयोजित कार्यक्रममा उनले भारतीय पर्यटकलाई गरिने अनावश्यक चेकजाँच, नोट सटही, र भारतीय गाडीहरूमाथि हुने कठोर कारबाहीका कारण पर्यटन क्षेत्र प्रभावित भएको उल्लेख गर्दै समस्या समाधानका लागि दुईपक्षीय पहल गरिने जानकारी दिए।
उनले सुविधा कटौती गरिएको भारतीय गाडीहरूलाई गन्तव्यभन्दा टाढा प्लेन्टी गरिनुपर्नेमा सिधै जफत गरेर भन्सार बुझाउने जस्ता कार्यले नकारात्मक सन्देश गएको बताए। यस्तो अवस्थाका कारण अपेक्षा अनुसार पर्यटक आउन नसकेको उनले जनाए।
मुख्यमन्त्री कार्कीले २०८२ साललाई ‘कोशी पर्यटन वर्ष’ का रूपमा मनाउन सरकारले विशेष योजना तयार पारेको र भारतका बिहार, पश्चिम बंगाललगायतका क्षेत्रबाट पर्यटक भित्र्याउन समन्वय र सहजीकरण गरिने बताए। उनले पर्यटनलाई कोशी प्रदेशको विकास र समृद्धिको मुख्य आधारका रूपमा अगाडि बढाइने उल्लेख गरे।
कोशी प्रदेश सरकारले आगामी वैशाख १ गते तेह्रथुमको मिल्के जलजले क्षेत्रमा ‘कोशी पर्यटन वर्ष’ को औपचारिक उद्घाटन गर्ने तयारी गरेको छ। मुख्यमन्त्री कार्कीको नेतृत्वमा मूल आयोजक समिति गठन भइसकेको छ।
मुख्यमन्त्री कार्कीले भारत-नेपालबीचको ऐतिहासिक र बलियो सम्बन्धको उपयोग गरी नेपालको पर्यटन प्रवर्द्धन गर्न सकिनेमा विश्वास व्यक्त गरे। मूल आयोजक समितिको बैठकपछि भारतीय पत्रकारहरूसँग उनले भारतीय पर्यटकलाई नेपाल भित्र्याउन हरेक चुनौतीलाई समाधान गर्दै पर्यटन प्रवर्द्धन गर्ने योजना रहेको जानकारी दिए।
