रविन्द्र यादव ,विराटनगर, जेठ ६ । नेपाल फोटो पत्रकार महासंघ, कोशी प्रदेशको आयोजनामा “पर्यटन प्रवर्द्धनका लागि फोटो पत्रकारको भूमिका” विषयक अन्तरक्रिया कार्यक्रम शनिबार विराटनगरस्थित होटल पाँचालीमा सम्पन्न भएको छ। कार्यक्रममा प्रदेश सरकारका पर्यटन, वन तथा वातावरण मन्त्री माननीय मण्डल प्रमुख अतिथिको रूपमा उपस्थित हुनुहुन्थ्यो।
मन्त्री मण्डलले फोटो तथा भिडियो सामग्रीले गन्तव्य पहिचान र प्रवर्द्धनमा महत्वपूर्ण योगदान पुर्याउने बताउँदै पर्यटन क्षेत्रको समग्र विकासमा फोटो पत्रकारहरूको सक्रिय भूमिकाको प्रशंसा गर्नुभयो। उहाँले दृश्य सामग्रीलाई पर्यटन प्रवर्द्धनको मूल आधारका रूपमा चित्रण गर्नुभयो।
कार्यक्रममा कोशी प्रदेशका पर्यटन, वन तथा वातावरण मन्त्रालयका प्रदेश सचिव विशाल घिमिरे, मन्त्री सचिवालयका कर्मचारी, तथा नेपाल फोटो पत्रकार महासंघ कोशी प्रदेशका अध्यक्ष वेदराज पौडेलको विशेष उपस्थिति रहेको थियो। अध्यक्ष पौडेलले सहभागी सबैप्रति आभार प्रकट गर्दै मन्त्री मण्डलप्रति धन्यवाद ज्ञापन गर्नुभयो।
कोशी प्रदेशभरिका फोटो पत्रकारहरूको सहभागिता रहेको कार्यक्रममा पर्यटन पत्रकारिता, विशेषगरी फोटो पत्रकारिताका अवसर, चुनौती र समाधानका उपायहरूबारे गहिरो छलफल गरिएको थियो।
मन्त्री सचिवालयले कार्यक्रम सफल बनाउन योगदान गर्ने सम्पूर्ण आयोजक, सहभागी तथा सरोकारवालाप्रति हार्दिक धन्यवाद प्रकट गरेको छ।
