वराहक्षेत्र । किराँत राई समुदायको महान पर्व उँभौलीको अवसरमा आयोजित साकेलासिली कार्यक्रमको उद्घाटन गर्दै सुनसरी क्षेत्र नं ४ का संघीय सांसद, नेपाली कांग्रेसका नेता तथा पूर्वअर्थमन्त्री ज्ञानेन्द्रबहादुर कार्कीले देशमा लोकतन्त्र स्थापनादेखि राष्ट्र निर्माणसम्म राई समुदायको महत्वपूर्ण योगदान रहेको बताएका छन्।
वराहक्षेत्र–६, ७ र ८ का किराँत राई यायोक्खा वडास्तरीय समितिहरूद्वारा चक्रघट्टीमा आयोजना गरिएको शुभकामना आदान–प्रदान कार्यक्रममा प्रमुख अतिथि कार्कीले सबै जातजातिका संस्कार, संस्कृति र पहिचानको संरक्षणमा जोड दिनुहुँदै भने, “हामी सबैले एक अर्काको जात, धर्म र संस्कृतिलाई सम्मान गर्दै एकताको भाव राख्नुपर्छ। नेपाल सबै जातजातिको साझा फूलबारी हो।
उहाँले नेपाली संस्कृतिको मौलिकता र विशिष्टता संसारभर चिनाउने काम गर्नुपर्ने बताउँदै संस्कृतिको संरक्षण गर्दै भावी पुस्तामा हस्तान्तरण गर्न सबैले आ–आफ्नो ठाउँबाट भूमिका निर्वाह गर्नुपर्नेमा जोड दिनुभयो।
कार्यक्रममा महेन्द्रनगर, भरील, चतरा, प्रकाशपुर, इटहरी र रामपुर (उदयपुर) क्षेत्रका किराँत राई यायोक्खाका टिमहरूको आकर्षक साकेलासिली नृत्य प्रस्तुत गरिएको थियो।
साकेलासिली प्रदर्शनीमा उत्कृष्ट प्रदर्शन गर्ने टोलीहरूलाई नगद पुरस्कार, प्रमाणपत्र तथा ट्रफी प्रदान गरिएको छ। पहिलो हुने टिमले २५ हजार, दोस्रोले १५ हजार र तेस्रो हुने टिमले १० हजार रुपैयाँ नगदसहित सम्मान प्राप्त गरेका छन्।
यस अवसरमा विविध सांस्कृतिक कार्यक्रममार्फत राई समुदायको समृद्ध संस्कृति झल्किएको थियो।
