जयकृष्ण यादव । इनरुवा
इनरुवा, असार ४ गते । सुनसरीको सदरमुकाम इनरुवा–३ को जनता आधारभुत विद्यालयको विद्यालय व्यवस्थापन समितिमा सरिता कार्की घिमिरे अध्यक्षमा निरविरोध चयन हुनुभएको छ । मानव अधिकारको क्षेत्र र महिला अधिकारको क्षेत्रमा लामो समयदेखी योगदान गर्दै आएको घिमिरेले पहिलो पटक विद्यालय व्यवस्थापन समितिको अध्यक्षमा निरविरोध चयन हुनुभएको हो । घिमिरेले शैक्षिक सुधार, बालमैत्री शिक्षण सिकाई, भौतिक पूर्वाधार निर्माण सहित समुदाय र विद्यालयको सम्बन्ध प्रगाढ बनाउने तर्फमा आफू कृयाशिल रहने बताउनुभएको छ । शिक्षा ऐन, कानुन र कार्यविधिको पूर्ण कार्यान्वयमा समेत आफूले ध्यान दिने बताउनुभएको छ । विद्यालय व्यवस्थापन समितिको सदस्यहरुमा नारायण दुलाल, मन्जु साह, शिवनारायण यादव, बिचनी मुसहर, छटुवा सदा, पदेन सदस्यमा इनरुवा ३ का वडा अध्यक्ष रमेश कुमार श्रेष्ठ र सदस्य सचिवमा विद्यालयका प्रधानाध्यापक अनु कोईराला रेग्मी रहनुभएको छ । समितिमा चार सदस्य अभिभावकबाट निरविरोध भएको र थप मनोनित सहित ९ सदस्य समिति निरविरोध चयन भएको विद्यालयले जनाएको छ । यस विद्यालयमा महिलामैत्री वतावरण बनेको छ सबै शिक्षक महिला रहेकोमा विद्यालय व्यवस्थापन समितिमा समेत महिला आएको र कक्षामा पनि छात्र भन्दा छात्राको संख्या बढी रहेको छ ।
