सुनसरी । जिल्ला समन्वय समिति निर्वाचनमा सत्ता गठबन्धनमा रहेको दलहरुले सुनसरीमा तालमेल गर्ने भएका छन् । जिल्ला समन्वय समिति निर्वाचनको लागि सुनसरीमा नेपाली काँग्रेस, नेकपा माओवादी केन्द्र, नेकपा एकीकृत समाजवादी र जसपाले तालमेल गर्ने निर्णय गरेको हो ।
आइतबार नेपाली काँग्रेस सुनसरीको पार्टी कार्यालयमा जिल्ला सभापति केदार भण्डारीको अध्यक्षता दलहरूबीच संयुक्त बैठक बसेर जिल्ला समन्वय समितिको निर्वाचनमा गठबन्धन गरेर अगाडि बढ्ने निर्णय गरेको छ । बैठकले जिल्ला समन्वय समिति निर्वाचनमा चुनावी तालमेल गर्ने निर्णय लिएको हो ।
बैठकले सहमति अनुसार नेकपा माओवादी केन्द्र, नेकपा एकीकृत समाजवादी र जनता समाजवादी पार्टीलाई १-१ जना महिला र नेपाली काँग्रेसलाई प्रमुख/उपप्रमुख सहित सदस्यहरु दिने निर्णय भएको हो ।
निर्णयमा नेपाली काँग्रेस सुनसरीका सभापति केदार भण्डारी, नेकपा माओवादी केन्द्र सुरुमाका अध्यक्ष योगेन्द्र प्रसाद मण्डल (पप्पु), नेकपा एकीकृत समाजवादीका जिल्ला अध्यक्ष गोबिन्द निराैला, जनता समाजवादी पार्टीका जिल्ला अध्यक्ष भगिरथ खत्वे हस्ताक्षर गरेका छन् ।
जिल्लामा नेपाली काङ्ग्रेसका ७ जना प्रमुख र ५ जना उपप्रमुख छन् । त्यस्तै, दोस्रो दल नेकपा एमालेको ३ जना प्रमुख र ६ जना उपप्रमुख छन् । त्यस्तै नेकपा माओवादी केन्द्रका १ जना उपप्रमुख, जसपका १ जना प्रमुख र स्वतन्त्रका १ जना प्रमुख छन् ।
